Лукашэнка будзе збіваць дроны сваім гелікаптэрам?
5- TELEGRAM-КАНАЛ «ЛІСТЫ ДА ДАЧКІ»
- 8.10.2024, 14:41
- 3,412
Беларускай СПА гэта не дапаможа.
Яны чамусьці раней беспілотнікі не збівалі? Бо ў іх указа не было. А зараз, з указам, яны адразу ўсе беспілотнікі збіваць пачнуць.
Раней як было? Раней беспілотнікі маглі збіваць толькі спецыяльна ўпаўнаважаныя СПА. А ўчора сёй-той падпісаў указ. І згодна з новым указам збіваць беспілотнікі (і авіямадэлі) упаўнаважаныя літаральна ўсе зацікаўленыя ў гэтым асобы.
Асобы, якія не вельмі зацікаўленыя, і асобы, якія зусім не зацікаўленыя, таксама ўпаўнаважаныя. Гэта значыць, мытнікі, пажарнікі, следчыя, судовыя экспэрты, паляўнічыя з рыбаловамі і пракуроры.
Вось, калі я табе ў той раз казаў, што беларускія ўлады абараняюць мірнае неба над галавой пастановамі пракуратуры, я ж думаў, што гэта я так жартую. І думаў, што можа быць нават крыху смешна. А высветлілася, што гэта наогул не смешна. Што яны па-іншаму проста не ўмеюць.
Я, праўда, крыху здзіўляюся, адкуль у іх такая вера ў магічную сілу сваіх нарматыўна-прававых актаў.
Беларуская СПА, напрыклад, і раней была ўпаўнаважаная збіваць усё, што дрэнна ляціць. І нічога гэтае беларускай СПА не дапамагло. Яно ўсё як лётала, так і лётае зараз кожны дзень.
Ну добра. Дапушчальны, гэта такі беларускі парадак, які фармаваўся стагоддзямі апошнія трыццаць гадоў. Калі ўсе дачыненні павінны рэгулявацца адпаведнымі нарматыўна-прававымі актамі.
Тады адкажы вось на якое пытанне. Хто больш кемлівы - тыя, хто без указу не здагадваліся, што варожыя беспілотнікі трэба збіваць, ці той, хто здагадаўся выдаць указ толькі на чацвёрты месяц пасля таго, як гэтыя беспілотнікі сталі баразніць мірнае беларускае неба?
Напраўду можаш не адказваць. Пытанне было з падвохам. Яны ўсе аднолькава кемлівыя. Але кожны па-свойму.
Ну вось, як ты сабе ўяўляеш гарант можа збіваць гэтыя беспілотнікі, калі ў яго СПА не той стстэмы? Сваім гелікаптэрам ці як? Не, можна збіваць беспілотнікі вербальнымі інтэрвенцыямі. І хіба хто-небудзь гэтага не рабіў? Ды на яго вербальныя інтэрвенцыі ўжо балюча было глядзець.
Але беспілотнікаў так шмат, што нават вербальных інтэрвенцый стала на ўсіх не ставаць. Таму сёй-той дэлегаваў свае паўнамоцтвы.
А тых, каму ён дэлегаваў паўнамоцтвы, таксама можна зразумець. Яны ж службовыя асобы. Яны раней упаўнаважаны не былі.
Я табе больш скажу. Яны і зараз яшчэ да канца не ўпаўнаважаны. Бо мала прыняць указ. У развіццё ўказа трэба яшчэ распрацаваць адпаведныя нарматыўна-прававыя акты.
Таму што ва ўказе не прапісаны ні функцыі адказных службовых асоб, ні парадак збівання беспілотнікаў, ні формы справаздачнасці. Як ты будзеш збіваць беспілотнікі (і авіямадэлі), калі ў цябе не зацверджана форма справаздачнасці? Гэта ж будзе хаос нейкі.
Памятаеш, я перажываў за ўварванне марсіянскіх трыножкаў? Дык усё. Ужо не хвалююся. У сэнсе не хвалююся за марсіянскія трыножкі. Як сказаў мне ўчора адзін добры чалавек, калі марсіяне нападуць на краіну, то да таго часу, калі будзе прыняты ўказ (і адпаведныя нарматыўна-прававыя акты), усё ўжо атрымаюць марсіянскія пашпарты.
Таму што так створаная беларуская стабільнасць. У беларускай стабільнасці ёсць адна галава, каб прымаць указы. А ў іншых галоў функцыя "думаць" не прапісаная ў службовых абавязках. А ў той галаве, якой прапісана, туман, натуральнае ўзроставае запаволенне кагнітыўных функцый і разлад вестыбулярнага апарата.
Таму ў беларускай стабільнасці добра атрымліваецца рухацца па прамой загадзя зададзенай траекторыі і з рэгулярнай хуткасцю. А рэзкія рухі і змены вектара ў беларускай стабільнасці ўжо не вельмі атрымліваюцца.
І добра на беспілотнікі стабільнасць адрэагавала нарматыўна-прававым актам толькі праз чатыры месяцы. А калі здарыцца чаго горшага?
Telegram-канал «Лісты да дачкі»
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
