Расею западозрылі ў падрыве аднаго з ключавых інтэрнэт-кабеляў на дне Балтыйскага мора

Узброеныя сілы Швэцыі знайшлі рух караблёў у моры, дзе напярэдадні адбылося пашкоджанне.

Еўрапейскія ўлады падазраюць Расею ў арганізацыі яшчэ адной дыверсіі ў Балтыйскім моры, пасля таго як два тэлекамунікацыйныя кабелі былі выведзеныя з працы ў пачатку тыдня, паведамілі The Wall Street Journal высокапастаўленыя чыноўнікі.

Раней паведамлялася пра пашкоджанне двух кабеляў. У мінулы панядзелак стала вядома, што ў Балтыйскім моры абарваўся кабель C-Lion1, пракладзены паміж Фінляндыяй і Нямеччынай паблізу расейскага газаправода «Паўночны струмень». Тады ж стала вядома пра абрыў яшчэ аднаго кабелю сувязі паміж Літвой і Швэцыяй.

Паліцыя Швэцыі супольна з берагавой аховай і вайскоўцамі пачала папярэдняе расследаванне паводле справы аб дыверсіі. Разрыў кабелю адбыўся ў тэрытарыяльных водах гэтай краіны. У расследаванні таксама бяруць удзел Фінляндыя, Літва, Нямеччына і іншыя дзяржавы.

Паводле словаў дзвюх крыніцаў, знаёмых з ходам следства, два пашкоджаныя кабелі перасякаюцца ў даволі невялікай зоне. Пашкоджанні, паводле іх словаў, хутчэй за ўсё, з'яўляюцца вынікам чалавечага ўмяшання, а не прыродных з'яваў.

Узброеныя сілы Швэцыі знайшлі рух караблёў у Балтыйскім моры, дзе напярэдадні адбылося пашкоджанне тэлекамунікацыйных кабеляў, паведаміў міністр грамадзянскай абароны краіны Карл-Оскар Болін.

«Узброеныя сілы Швэцыі і берагавая ахова ў сваіх назіраннях за становішчам на моры выявілі рух караблёў, якія ў часе і месцы супадаюць з збоямі ў працы [кабеляў]», – сказаў ён у інтэрв'ю TV4 Nyheterna.

Болін таксама дадаў, што пасля гэтага паліцыя пачала папярэдняе расследаванне паводле факту магчымай дыверсіі.

З моманту расейскага ўварвання ва Украіну заходнія чыноўнікі не раз абвінавачвалі Маскву ў вядзенні ценявой вайны на еўрапейскай тэрыторыі. Сярод іншага, Расею абвінавачвалі ва ўстаноўцы запальных прыладаў на самалётах, арганізацыі падпалаў у Вялікай Брытаніі і Чэхіі, дыверсіях на нямецкіх ваенных аб'ектах і планаванні забойства генеральнага дырэктара кампаніі Rheinmetall, адзначаюць супрацоўнікі амерыканскай і нямецкай выведак.

Прадстаўнікі еўрапейскіх і амерыканскіх праваахоўных органаў і палітыкі мяркуюць, што мэта падобнай схаванай аперацыі – сеяць паніку, адрываць рэсурсы бяспекі і ўзмацняць ціск на заходнія ўрады, падтрымліваючы палітычныя партыі, якія выступаюць супраць ваеннай дапамогі Украіне.

На гэты момант парушэнне працы падводных кабеляў выклікала толькі нязначныя праблемы для закранутых краінаў, паводле звестак аператараў і ўладаў.

«Мы рыхтуемся да такіх падзей, і ў нас ёсць некалькі кабеляў і маршрутаў для забеспячэння рэзервавання, таму канчатковы вынік гэтага інцыдэнту – толькі запаволенне абслугоўвання некаторых правайдараў», – адзначыў высокапастаўлены чыноўнік Фінляндыі.

Раней міністр абароны Нямеччыны Барыс Пісторыюс заявіў, што пашкоджанне кабелю C-Lion1 магло адбыцца ў выніку дыверсіі. «Ніхто не верыць у тое, што гэты кабель выпадкова быў разарваны. Я не схільны верыць версіі, паводле якой пашкоджанне адбылося таму, што кабель закрануў якар. Варта зыходзіць з таго, што гэта быў акт дыверсіі. Таму мы павінны канстатаваць – не ведаючы дакладна, ад каго гэта зыходзіць, – што гэта гібрыднае дзеянне», – адзначаў міністр.

Пра разрыў тэлекамунікацыйнага кабелю стала вядома ў мінулы панядзелак. Паводле звестак фінскага дзяржаператара Cinia Oy, прычынай стала «знешняе ўздзеянне». У кампаніі не выключылі «наўмыснага разрыву». Распачатае расследаванне.

Пашкоджанне выявілі блізу 4-й гадзіны ночы на кабелі C-Lion1 з прапускной здольнасцю 144 тэрабайты за секунду, які пралягае ад фінскай Сантахаміны да нямецкага Ростака. На месца быў накіраваны рамонтны карабель. Паслугі праз кабель часова не падаюцца. Няспраўнасць плануюць ухіліць цягам 15 дзён.

C-Lion1 быў першым кабелем, пракладзеным наўпрост паміж Фінляндыяй і Нямеччынай. Папярэднія каналы сувязі праходзілі праз Швэцыю і Данію. Ён быў уведзены ў эксплуатацыю ў 2016 годзе, яго даўжыня складае 1173 кіламетры.

Інцыдэнты адбыліся праз два месяцы пасля таго, як ЗША папярэдзілі пра ўзмацненне расейскай вайсковай актыўнасці вакол ключавых падводных кабеляў. Амерыканскія чыноўнікі заяўлялі, што Мінабароны РФ рыхтуе спецыялізаванае падраздзяленне для правядзення дыверсій, накіраваных на пашкоджанне крытычна важнай інфраструктуры сувязі краінаў NATO.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com