У Парэччы «аптымізавалі» працу вакзала

Скарацілі штат, пакінуўшы толькі начальніка станцыі.

У аграгарадку Парэчча скарачаюць працу чыгуначнага вакзала. З супрацоўнікаў застаўся толькі начальнік станцыі, а ў выходныя дні вакзал зачынены. Да новага фармату працы вакзала гараджане паставіліся негатыўна - зараз ім даводзіцца чакаць цягнікі на дварэ.

Персанал і час працы вакзала скарацілі, піша hrodna.life.

Да лістапада 2024 года на станцыі працавалі трое дзяжурных і начальнік. Але баранавіцкае аддзяленне БЧ пастанавіла скараціць штат, пакінуўшы толькі начальніка станцыі.

Цяпер вакзал працуе паводле скарочанага раскладу: з 8:30 да 17:00 з панядзелка да пятніцы. У суботу і нядзелю патрапіць унутр вакзала нельга. Разам з ім закрываецца і аддзяленне банка, якое арандуе плошчы. Недаступная і прыбіральня.

У мясцовых жыхароў гэта выклікала абурэнне. У першую чаргу з-за таго, што зараз ім больш складана аплачваць камунальныя паслугі або абменьваць валюту. Таксама парэчане і тыя, хто прыязджае з Гародні, незадаволеныя, што ў выхадныя прыбыцця дызеля даводзіцца чакаць на дварэ, схаваўшыся пад навес.

Дызель праязджае аграгарадок чатыры разы на дзень. Найбольшай папулярнасцю ён карыстаецца ў цёплую пару года. Запаўняльнасць вагонаў - да 600 чалавек.

Вакзал не закрываюць, а «аптымізуюць»

Прычына такіх новаўвядзенняў - аптымізацыя працы вакзала і ўвядзенне тэхналогіі «бязлюднай язды», расказаў намеснік начальніка Баранавіцкага аддзялення БЧ Дзмітрый Гарус.

З ягоных слоў, канчаткова зачыняць вакзал не будуць. А аптымізацыя з'яўляецца «вымушанай мерай», бо прыбытак ад састарэлых дызеляў не кампенсуе выдаткі на іх утрыманне.

Найстарэйшы вакзал Беларусі

Вакзал у Парэччы - самы стары ў Беларусі. Яго адкрылі ў 1862 годзе. На вакзале дзейнічае музей, а кожны год летам у Парэччы праходзіць «свята вакзала».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com