Больш, чым пад Сталінградам: колькі тэхнікі страціла РФ у бітвах за Пакроўск

Страты Расеі блізкія да колькасці ўсёй Заходняй вайсковай акругі РФ.

УС РФ працягваюць наступ на Пакроўск у Данецкай вобласці. Аднак «бітва пад Пакроўскам» ужо стала найбуйнейшай бітвай не толькі вайны Расеі супраць Украіны, але і стала адной з найбуйнейшых бітваў у гісторыі ў колькасці страчанай бранятэхнікі. Пра гэта піша ваенны журналіст Уладзімір Дацэнка.

У суполцы на Х Дацэнка адзначае, што ў спробах захапіць Пакроўск страты Расеі блізкія да колькасці ўсёй Заходняй вайсковай акругі Расеі на 2022 год, які рыхтаваўся да вайны з NАТО. А гэта блізу 60% ад сіл, якімі Расея планавала захапіць Украіну за тры дні ў 2022 годзе.

Толькі візуальна пацверджаныя страты расейскага войска за 13 месяцаў баёў у раёне Пакрова складаюць 1800 адзінак бранятэхнікі. Рэальныя страты яшчэ большыя.

Лічбы страт наступальнай тэхнікі Пакроўскага раёна на 15 лістапада 2024 года сцісла складаюць:

больш за 580 танкаў;

больш за 1220 розных баявых машын;

блізу 10 артылерыйскіх установак;

больш за 150 тысяч салдат УС РФ.

Колькасць страт расейцаў у Пакроўскай бітве блізкая да колькасці Заходняй вайсковай акругі на 2022 год, у склад якой уваходзілі тры арміі: 1-я танкавая армія, 6-я і 20-я агульнавайсковыя арміі.

Заходняя вайсковая акруга Расейскай Федэрацыі павінна была супрацьстаяць «узброеным сілам NАТО на тэрыторыі Еўропы», а Першая танкавая армія была самым вялікім гонарам Пуціна і самым буйным танкавым войскам свету.

Варта адзначыць, што ўсе гэтыя рэсурсы былі выдаткаваныя падчас наступу на два невялікія гарады: Аўдзееўку і Пакроўск, насельніцтва якіх да вайны складала блізу 95 тысяч чалавек.

«Расея страціла пад Пакроўскам больш танкаў, чым кожная краіна Еўропы мае ў сваім войску. Ці больш салдат, чым усе Узброеныя сілы Вялікабрытаніі. Памятайце пра гэта, калі будзеце чытаць навіны пра баі за невялікае мястэчка на ўсходзе Украіны. Магчыма, у будучыні гісторыкам давядзецца перагледзець тэрмін «Пірава перамога» і замяніць яго на «наступ Пуціна», — адзначае Дацэнка.

Але не відаць, што Уладзімір Пуцін і ягоныя генералы здольныя адмовіцца ад далейшага наступу на Пакроўск, чаго б гэта ні каштавала расейскаму войску.

Цяпер страты расейцаў у бранятэхніцы пад Пакроўскам перавышаюць страты нямецкага войска ў Сталінградскай бітве. Пакроўская бітва можа стаць адным з найбуйнейшых наступаў у гісторыі ў колькасці страчанай бранятэхнікі, сцвярджае Дацэнка.

На кожны кіламетр акупаванай тэрыторыі ў гэтым кірунку Расея страчвае ў 10-15 разоў больш рэсурсаў, чым па ўсіх кірунках. І гэта сведчыць пра вар'яцкую апантанасць Пуціна паказаць усім, што расейскае войска не спыняецца, а працягвае наступаць нават коштам вялізных страт.

«Магчыма, у найбліжэйшыя месяцы нас чакаюць не менш жорсткія баі і лабавыя атакі расейскага войска. Гэтыя месяцы стануць кульмінацыяй Пакроўскага наступу. Наступ, у якім Расея страціць тры арміі, каб зацвердзіць амбіцыі свайго дыктатара», - рэзюмуе Дацэнка.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com