Войска не будзе ваяваць за Лукашэнку

У беларускіх генералаў няма ніякіх ілюзій наконт сваёй баяздольнасці.

У сучасных ваенных стратэгіях і тактыках нічога не разумею. Таму я чытаю разумных людзей, якія разбіраюцца. І вось людзі, якія разбіраюцца, пішуць пра асаблівасці вядзення вайсковых дзеянняў у Курскай вобласці паўночнакарэйскімі салдатамі. Дык я хачу сказаць, што, мяркуючы з усяго, паўночнакарэйскія салдаты ў сучасных ваенных стратэгіях і тактыках разумеюць яшчэ менш за мяне.

І чаму я не здзіўлены? А я табе даўно казаў, што паўночнакарэйскі Кім дарма надумаў праверыць непераможнасць свайго войска ў практычных палявых умовах.

Бо непераможныя войскі бываюць непераможныя, пакуль іх непераможнасць ніхто не правяраў. І калі ты хочаш, каб тваё войска засталося непераможным, то ад практычных баявых дзеянняў яго лепш трымаць далей.

А паўночнакарэйскае войска, я табе скажу, у тэлевізары яшчэ больш непераможнае, чым беларускае. Ламаць галавой цэглу беларускія і паўночнакарэйскія “красаўцы” ўмеюць аднолькава, але ў Паўночнай Карэі такіх “красаўцаў” значна больш.

І вось раптам высветлілася, што навык разбівання цэглы галавой чамусьці зусім не актуальны ва ўмовах сучасных ваенных дзеянняў. І ўменне выконваць складаныя акрабатычныя штукі не дапамагае супраць баявых дронаў.

І ўвогуле высветлілася, што актуальны супраціўнік, у адрозненне ад умоўнага, зусім не ўмее ваяваць паводле правіл. Таму што ў сваіх баявых дзеяннях ён увогуле не ўлічвае непераможны статус непераможнага войска.

Я б мог табе сказаць, што супраць актуальнага супраціўніка беларускае войска будзе ваяваць як паўночнакарэйскае. Але не скажу. Бо ёсць адзін маленькі, але вельмі важны нюанс.

Я падазраю, што беларускае войска, у адрозненне ад паўночнакарэйскага, ва ўмовах практычных баявых дзеянняў за свайго гаранта ваяваць у прынцыпе не будзе.

За выключэннем асобных зусім адурманенных “красаўцаў”. Але зусім адурманеныя “красаўцы” добрыя ў баявых дзеяннях супраць няўзброеных дэструктыўных пенсіянерак. А на ўзброенага супраціўніка “красаўцы” не падпісваліся.

А іншы важны нюанс у тым, што, у адрозненне ад паўночнакарэйскага Кіма, у беларускіх генералаў няма ніякіх ілюзій наконт сваёй баяздольнасці. Гэтых ілюзій нават у беларускага тэлевізара няма.

За выключэннем, можа Азаронка, які пахваліў гаранта стабільнасці за тое, што гарант высадзіўся на берагах Амана "як сябар, а не як заваёўнік". Але Азаронак божы чалавек. Яму можна.

А астатнія, асабліва гарант стабільнасці, ацэньваюць свой баявы патэнцыял так, як ён таго заслугоўвае. Таму ваююць у тэлевізары з уяўнымі супраціўнікамі і гучна трасуць ва ўсе бакі віртуальным «Арэшнікам». Таму што рэальнага супраціўніка іх баяздольнасць не вытрымае.

Telegram-канал "Лісты да дачкі"

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com