У ЗША высмеялі расейскі лімузін, які Пуцін падарыў Ыну

Прадстаўнік дзярждэпартамента пажартаваў наконт "гарантыі" на аўто.

Прадстаўнік дзярждэпартамента Мэцью Мілер ЗША высмеяў падарунак прэзідэнта Уладзіміра Пуціна лідару Паўночнай Карэі Кім Чэн Ыну - расейскі аўтамабіль, паведамляе Guargian.

“Спадзяюся, Кім атрымае пашыраную гарантыю, - пажартаваў Мілер. - Я, шчыра кажучы, не ведаў, што існуе такая рэч, як расейскі раскошны аўтамабіль”. Мілер зазначыў, што сваім падарункам Пуцін парушыў санкцыі ААН, уведзеныя супраць КНДР праз ядзерную праграму рэспублікі.

У пачатку тыдня Пуцін падарыў кіраўніку Паўночнай Карэі Кім Чэн Ыну на дзень нараджэння лімузін Aurus расейскай вытворчасці коштам больш за 40 млн рублёў ($440 тысяч). Пра падарунак Пуціна Кіму паведаміла паўночнакарэйскае дзяржаўнае агенцтва ЦТАК. Гаворка ішла пра "асаблівы аўтамабіль расейскай вытворчасці". Сястра кіраўніка КНДР Кім Ё Чжон адзначыла, што гэты падарунак "служыць нагляднай дэманстрацыяй асаблівых сяброўскіх стасункаў паміж лідарамі дзвюх краін".

У Міністэрстве аб'яднання Паўднёвай Карэі заявілі, што Масква "павінна ўсведамляць сваю адказнасць як пастаянны сябра Рады бяспекі ААН і спыніць дзеянні, якія падрываюць міжнародныя нормы". Таксама ведамства асудзіла Пхеньян "за нахабнае публічнае прызнанне парушэння санкцый".