Танкі Abrams ударылі па расейцах пад Аўдзееўкай

Амерыканскую тэхніку ў баі ўпершыню паказалі на відэа.

Украінскія танкісты паказалі баявое прымяненне танка Abrams M1 на Аўдзееўскім кірунку. Адзначаецца, што байцы брыгады выкарыстоўваюць машыны ўжо больш за месяц. Да гэтага ніякіх відэа з поля бою на амерыканскіх машынах не было. Вядома, што некаторыя з танкаў абсталёўваюць дадатковай дынамічнай абаронай ARAT-1, каб лепш супрацьстаяць кумулятыўным пагрозам.

На відэа танк Abrams робіць некалькі стрэлаў, магчыма, па варожых акопах, а затым адыходзіць з пазіцыі. Усю працу машыны фіксуе ўкраінскі беспілотнік.

«Ён вельмі жывучы ў баі, бо ўвесь боекамплект размешчаны за межамі вежы ў спецыяльнай задняй нішы. У выпадку паразы - энергія выбуху ідзе ўверх. А магутная шматслаёвая браня робіць «Abrams» адным з самых абароненых танкаў у свеце», - напісалі вайскоўцы.

Украінскае войска атрымала 31 танк у версіі Situational Awareness, якія з'яўляюцца даволі распаўсюджанай мадэллю ў ЗША. Танк не можа страляць праграмаванымі боепрыпасамі, але мае адзін цеплавізійны прыцэл 2 пакаленні для наводчыка, а для камандзіра ёсць цеплавізар на кулямётнай усталёўцы на вежы.