Ва УСУ назвалі зброю, якая прымусіць РФ адмовіцца ад акупацыі Украіны

Сілы абароны фармуюць «магутны кулак».

Украіна пачала выкарыстоўваць дроны яшчэ ў часы правядзення АТА, і з таго часу гэты падыход развіваецца, заявіў намеснік гетмана Узброеных сіл Украіны Вадзім Сухарэўскі на форуме «Украіна. Год 2024».

«Погляды на ўжыванне беспілотных сістэм у нас з'явіліся яшчэ даўно, у 2016 годзе. Яшчэ тады мы пачалі скідаць на галовы супраціўніка гранаты. Гэта стала мэйнстрымам, і страты ворага праз удары дронамі сталі расці. І з гадамі мы атрымалі магутную базу і досвед ужывання беспілотных сістэм на полі бою. Гэта найлепшы досвед у свеце», - распавёў Сухарэўскі.

Ён растлумачыў, што перад ім паставілі тры ключавыя мэты па развіццю выкарыстання беспілотных сістэм ва Украіне - гэта эфектыўнасць, сістэмнасць і аналіз.

«Падраздзяленне, якое будзе сфармаванае (Сілы беспілотных сістэм – рэд.), – гэта будзе магутны кулак, які стане развязваць рэальныя задачы на полі бою, які будзе надзейным плячом падтрымкі для нашых баявых брыгад. Гэты элемент дасць нам магчымасць асіметрычна адказваць на ўсе дзеянні супраціўніка, наносіць яму максімальныя страты», - сказаў намеснік Сырскага.

Ён таксама дадаў, што Украіна рухаецца да таго, каб стварыць сістэмны падыход да выкарыстання дронаў на полі бою: «Мы павінны зрабіць тое, што ў будучыні ляжа ва ўсе падручнікі вайсковай гісторыі і будзе разглядацца як эфектыўны прыклад рэакцыі ў баявых дзеяннях у будучыні. Тэза, што генералы рыхтуюцца да ўчорашняй вайны, адпала, і Украіна з'яўляецца прыкладам таго, як яно павінна быць».

Са слоў Сухарэўскага, дзякуючы дронам, Сілы абароны могуць зрабіць так, каб РФ адмовілася ад ідэі акупацыі Украіны: «Мы павінны адсекчы ад нашага салдата максімум сродкаў паражэння супраціўніка. Беспілотныя сістэмы будуць працаваць не толькі ў паветры, гэта будзе і на зямлі, і ў моры. Гэта будзе мець сістэмны характар, мы маем бачанне, мэту і падтрымку».

Нагадаем, што міністр абароны Украіны Рустэм Умераў заявіў, што план дзеянняў Узброеных сіл Украіны на 2024 год ёсць, ён магутны і павінныя быць вынікі.