Хусіты атакавалі падводныя інтэрнэт-кабелі, якія злучаюць Еўропу і Азію

Пашкоджаныя чатыры лініі сувязі.

Еменскія хусіты пашкодзілі чатыры падводныя кабелі ў Чырвоным моры паміж Джыдай у Савудаўскай Арабіяй і Джыбуці ва Усходняй Афрыцы, піша ізраільскае выданне Globes.

Паводле ягоных звестак, размова ідзе аб кабелях кампаній AAE-1, Seacom, EIG і TGN. Атака хусітаў выклікае сур'ёзныя збоі ў інтэрнэт-камунікацыі паміж Еўропай і Азіяй, мацней за ўсё пацярпелі карыстальнікі краін Персідскай затокі ды Індыі, адзначае Globes. Разам з тым выданне называе шкоду значнай, але не крытычнай, паколькі праз той жа рэгіён праходзяць іншыя кабелі, якія злучаюць Азію, Афрыку і Еўропу.

Паводле ацэнак Globes, рамонт пашкоджаных кабеляў можа заняць не менш за восем тыдняў. Тэлекамунікацыйныя кампаніі будуць змушаныя шукаць тых, хто пагодзіцца выканаць гэтыя працы і, магчыма, выплацяць высокую прэмію за рызыкі, піша выданне.

Кабель EIG (European India Gateway) злучае Паўднёвую Еўропу з Егіптам, Савудаўскай Арабіяй, Джыбуці, ААЭ і Індыяй. Акцыямі EIG валодае кансорцыум, які ўключае AT \u0026 T, Saudi Telecom, Verizon і індыйскую Bharat Sanchar.

TGN Atlantic быў пракладзены Tyco International у 2001 годзе і прададзены індыйскай кампаніі Tata Communications у 2005 годзе за $130 млн.

AAE-1 злучае Усходнюю Азію з Еўропай праз Егіпет. Прапускная здольнасць кабеля - 40 ТБ/с.

Кабель Seacom злучае Еўропу, Афрыку і Індыю, а таксама Паўднёвую Афрыку.

Пасля нападу ХАМАС на Ізраіль у кастрычніку 2023 года хусіты абвясцілі аб намеры атакаваць караблі і суда, звязаныя з габрэйскай дзяржавай. Аднак удары зазналі таксама камерцыйныя судны трэціх краін. Усе былі вымушаныя выбіраць абыходныя маршруты.

Са снежня міжнародная кааліцыя на чале з ЗША абвясціла аб правядзенні ў рэгіёне аперацыі "Вартавы росквіту" ў мэтах гарантавання бяспекі судоў.