У Баранавічах карова не хацела ісці на забой і ўзняла бунт

Відэа.

Днямі ў сеціве з'явілася відэа, знятае ў Баранавічах, дзе грузавік даслоўна буксуе карову — галава і пярэднія ногі жывёліны знаходзяцца ў кузаве, а па праезнай частцы яна ідзе толькі на задніх нагах. Што адбылося напраўду, высветліла міліцыя і расказала парталу «Наш край».

Жыхар Баранавічаў зняў ролік 26 лютага апоўдні, калі вяртаўся на працу з абеду. Ён убачыў, як па вуліцы Куйбышава, у раёне дзіцячай лякарні, ехала спецыяльна абсталяваны для перавозкі жывёл грузавы аўтамабіль, за ім ішла карова, галава якой знаходзілася ў кузаве. Ззаду па праезнай частцы ішоў мужчына, які, мяркуючы з усяго, стараўся кантраляваць паводзіны жывёлы.

На ролік звярнулі ўвагу ў Баранавіцкім ГАУС і правялі праверку. Вось як усё было.

Машына перавозіла ў кузаве пяць кароў і кіравалася на вуліцу Калініна. На скрыжаванні адна з жывёл - тая самая карова з відэа - узбунтавалася, зламала борт грузавіка і задняй часткай апынулася на дарозе. Учапіўшыся пярэднімі нагамі, карова не змагла рушыць ні назад, ні наперад. Кіроўца не змог дапамагчы жывёле забрацца назад у кузаў, бо вага дарослай асобіны даходзіць да 750 кг. Выцягнуць яе з кузава цалкам таксама не варыянт. Жывёла магла павесці сябе непрадказальна, да таго ж і астатнія жывёлы спалохаліся і маглі канчаткова зламаць задні борт. Тады наступствы маглі б быць яшчэ больш сур'ёзнымі…

У гэты момант да кіроўцы грузавіка падышоў прахожы і прапанаваў сваю дапамогу. Карову прывязалі, і суправаджаючы ішоў з палкай па праезнай частцы за аўтамабілем да кропкі прызначэння.

- Асоба кіроўцы грузавога аўтамабіля ўстаноўленая. Мужчына, мясцовы жыхар, працуе ў адным з прадпрыемстваў рэгіёна. Ён вёз пяць асобін буйной рагатай жывёлы на забой. Кіроўца прыцягнуты да адміністрацыйнай адказнасці за парушэнне правілаў перавозкі грузаў, - паведамілі ў міліцыі.

Сам кіроўца прызнаўся супрацоўнікам аддзела ДАІ, што вельмі напалохаўся: падобнае з ім адбывалася ўпершыню. Выказаць здагадку, што задні борт зусім новага грузавіка можа зламацца, мужчына не мог. Тым не менш, кіроўцу вынесена папярэджанне з унясеннем у базу адміністрацыйных правапарушэнняў, але без штрафу.

А з супрацоўнікамі прадпрыемства правядуць прафілактычныя гутаркі, каб у далейшым выключыць такія выпадкі.