Архібіскупа Тадэвуша Кандрусевіча выпісалі са шпіталя

Стаў вядомы дыягназ, з якім яго шпіталізавалі.

Ганаровы мітрапаліт Мінска-Магілёўскі арцыбіскуп на спачыне Тадэвуш Кандрусевічвыпісаны з 1-й гарадской клінічнай лякарні, паведаміў партал Рымска-каталіцкага касцёла ў Беларусі.

"Практычна напярэдадні Вялікага посту, 12 лютага, я трапіў у лякарню з дыягназам мігатлівая арытмія сэрца і праходзіў курс лячэння да 27 лютага", - паведаміў герарх.

Кандрусевіч падзякаваў медыкам, а таксама ўсім, хто маліўся за яго. Ён таксама паведаміў, што 3 сакавіка будзе цэлебраваць імшу ў менскім архікатэдральным касцёле Найсвяцейшай Панны Марыі.

Нагадаем, Тадэвуш Кандрусевіч займаў пасаду мітрапаліта Мінска-Магілёўскага з 2007 года, з'яўляючыся лідарам Касцёла ў Беларусі. Падчас пратэстаў 2020 года ён асудзіў улады за кровапраліцце, гвалт і масавыя арышты.

31 жніўня 2020-га, калі Кандрусевіч вяртаўся ў Беларусь з Польшчы, памежнікі не дазволілі яму ўехаць у краіну без тлумачэння прычын, хаця ён грамадзянін Беларусі. На наступны дзень Аляксандр Лукашэнка заявіў, што Кандрусевіч нібыта "хаваў наяўнасць іншых грамадзянстваў, займаўся антыдзяржаўнай дзейнасцю і атрымаў нейкае заданне ў Варшаве". Яшчэ праз два тыдні ў МУС заявілі, што пашпарт Кандрусевіча прызналі несапраўдным праз праверку на прыналежнасць да беларускага грамадзянства, аднак самога грамадзянства ён пазбаўлены не быў. У лістападзе Лукашэнка заявіў, што Кандрусевіч "ездзіў у Польшчу і атрымліваў кансультацыі, як разбураць краіну".

У снежні ў Беларусі пабываў Апостальскі нунцый Клаўдыё Гуджэроці і перадаў Лукашэнку пасланне з просьбай разгледзець сітуацыю. Неўзабаве нунцыятура паведаміла аб атрыманні інфармацыі, што перашкод для вяртання Кандрусевіча няма. Ужо праз два дні, напярэдадні Калядаў, 24 снежня, арцыбіскуп вярнуўся ў Беларусь. А праз тыдзень, 3 студзеня 2021 года, абвясціў, што сыходзіць у адстаўку са сваёй пасады ў сувязі з дасягненнем 75-гадовага ўзросту. Месца мітрапаліта Мінска-Магілёўскай парафіі Рымска-каталіцкай царквы ў Беларусі заняў Іосіф Станеўскі.