Як украінская СПА навучылася збіваць расейскія Су-34

У супраціўніка знайшлі «ахілесаву пяту».

Украінскае войска 29 лютага збіла 3 расейскія самалёты Су-34 на Аўдзееўскім і Марыюпальскім напрамках. Дакладна невядома, якую зброю выкарыстоўваюць вайскоўцы, але яна вельмі эфэктыўная. «Фокус» паразмаўляў з авіяцыйным экспэртам і намеснікам дырэктара адной з украінскіх кампаній, якая распрацоўвае комплексы РЭБ Анатолем Храпчынскім, каб даведацца, якія ёсць уразлівыя месцы ў варожых самалётаў. Ён спыняецца на двух важных момантах:

РФ масава запускае КАБ з-за чаго самалёты могуць заходзіць у зону дзеяння ўкраінскай СПА;

украінская СПА ўзмацнілася ў рамках праекта FrankenSAM, які дазваляе паляпшаць савецкія сістэмы заходнімі тэхналогіямі, інтэграцыяй новых зенітных ракет.

Далей спецыяліст кажа, што на расейскіх самалётах усталяваны комплекс "Хібіны". Ён павінен рабіць самалёт незаўважным для ЗРК.

“Я як спецыяліст у РЭБ разумею, што тут жа нешта дрэнна працуе, бо не спраўляецца ён. Гэты сродак РЭБ павінен ствараць пэўныя перашкоды для тых ракет, якія ляцяць у бок самалёта. Ён павінна ствараць перашкоды непасрэдна для радыёлакацыйных сістэм. Больш за тое, гэтыя сістэмы павінны выяўляць зенітныя ракеты. Ставяцца кантэйнеры пад крылы, якія дазваляюць вакол сябе бачыць ракеты”, - тлумачыць Храпчынскі “Фокусу”.

Для Украіны адкрылася прастора для дзеянняў. Су-34 лятаюць у непасрэднай блізкасці ад зоны дзеяння СПА, а сістэма РЭБ, якая павінна абараняць і выяўляць пагрозы, недасканала працуе.

Падабраць правільны ключ. Што вядома пра РЭБ “Хібіны”

Радыёэлектронны комплекс "Хібіны" складаецца адразу з некалькіх сістэм:

сістэма радыётэхнічнай выведкі (РТР);

сістэма пастаноўкі актыўных перашкод індывідуальнай абароны (САП);

шырокапалосны блок дакладнага запамінання частаты (ТШ);

вылічальная шматпрацэсарная падсістэма;

кантэйнерная сістэма пастаноўкі актыўных перашкод групавой абароны.

На самалёце Су-34 усталяваны комплекс "Хібіны-10В", а ў Су-34С "Хібіны-М". За час поўнамаштабнай вайны Украіна ўжо не раз збівала расейскія самалёты. Увосень 2022 года на месцы збітага Су-30 у Харкаўскай вобласці была выяўлена практычна непашкоджаная частка РЭБ “Хібіны-У”. У The War Zone пісалі, што захоп комплексу мае вялікі патэнцыял для даследавання ўзору. Таксама ў выданні выказалі здагадку, што з такой колькасцю збітых бартоў над Украінай, Кіеў мог амаль напэўна атрымаць узоры іншых комплексаў РЭБ. Да таго ж са слоў Анатоля Храпчынскага, “Хібіны” — гэта савецкі комплекс, які расейцы крыху дапрацавалі.

“Можна меркаваць, што Украіна знайшла “ахілесаву пяту”, за кошт чаго яна спраўляецца з імі, але тут трэба прызнаць высокую кваліфікацыю нашых вайскоўцаў, што дазволіла ім знайсці такі шлях. Але гэта вельмі адчувальная інфармацыя. Больш падрабязна мы, відаць, даведаемся пра ўсё ўжо пасля вайны. Разам з тым гэта пацвярджэнне той тэзы, якую я ўвесь час паўтараю: расейскі РЭБ пераацэнены”, — працягвае спецыяліст.

Як працуе РЭБ на самалёце

Падчас палёту самалёт павінен ствараць вызначанае электрамагнітнае поле, якое ўплывае на ўсё, што ляціць у бок самалёта і робіць немагчымым траплянне па ім. Таксама ёсць перашкоды, якія накіраваны на наземныя РЛС комплексаў СПА. "Хібіны" павінны абараняць не толькі сам самалёт, але і групу, у складзе якой ён можа ляцець.

Калі комплекс СПА ужо выпускае зенітную ракету, то запуск інфрачырвоных пастак і супрацьракетны манеўр з'яўляецца ўжо апошняй мяжой, растлумачыў “Фокусу” авіяцыйны экспэрт. Су-34 не моцна прызначаны для такіх рэзкіх манеўраў, таму ён звычайна скідае ўсё ўзбраенне, каб адысці ад пагрозы і манеўраваць.

Без А-50 як без рук. Чаму расейскай авіяцыі стала складаней лятаць над Украінай

Акрамя таго, што УСУ збіваюць тактычную авіяцыю, Украіна таксама знішчыла варожы самалёт-выведчык А-50, які сканаваў тэрыторыю ў радыусе сотняў кіламетраў. А-50У, які збілі над Азоўскім морам, дапамагаў акупантам выяўляць украінскія сродкі СПА, радыёлакацыйныя станцыі і даваў магчымасць рыхтавацца да ракетных абстрэлаў Украіны.

«Пачнём з таго, што А-50 дазваляў выяўляць гэтыя сродкі супрацьпаветранай абароны, якія маглі быць непасрэдна блізка да лініі фронту на адлегласці такой, якая магла б знішчаць тыя Су-34. РЛС А-50 дазваляў рабіць выведку і ствараць пэўную карту, на якой было відаць перадыслакацыю або размяшчэнне радыёлакацыйных сістэм або нават асобных пускавых, калі яны стаяць асобна», - распавёў Храпчынскі аб тым, як страта А-50 уплывае на тактычную авіяцыю РФ.

Таму А-50 мог папярэдзіць знішчальнікі, што ва ўмоўным квадраце нельга працаваць, таму што там стаяць такія ЗРК, здольныя знішчыць самалёт на такой адлегласці. Страта самалёта з такімі характарыстыкамі будзе ўплываць на ВКС РФ і ў далейшым, калі акупанты не будуць запускаць А-50, якія засталіся ў шыхце. Асобна спецыяліст зазначыў, што страта экіпажа з'яўляецца вялікім ударам для ворага.