На цырымоніі пахавання Навальнага пачаліся перабоі з мабільным інтэрнэтам

На месцы таксама дзяжурыць шмат паліцыянтаў.

У раёне царквы іконы Божай Маці “Спатоль мой смутак” у Мар'іна, дзе павінна прайсці адпяванне Аляксея Навальнага, пачаліся перабоі ў працы мабільнага інтэрнэту, паведаміў карэспандэнт “Медыязоны”.

Паводле ягоных слоў, у Telegram паведамленні адпраўляюцца некалькі хвілін, а "Яндэкс.карты" зусім не знаходзяць злучэнні.

Напярэдадні праваахоўныя органы ўстанавілі побач з царквой антэну, якая заклікана забяспечыць спецсувязь сілавікам на час, пакуль астатнім яе будуць глушыць, пісаў The Insider. Рабочы, які мантажаваў гэтае абсталяванне, сказаў карэспандэнту выдання, што пастанова глушыць сувязь будзе залежаць ад паводзін людзей, якія прыйдуць развітацца з Навальным.

Пры гэтым паліцыянты падрыхтаваліся да наведвання цырымоніі вялікай колькасцю людзей. Яны выставілі металічныя агароджы ад станцыі метро "Мар'іна" да царквы, а таксама па яе перыметры. Развітацца з палітыкам да 12 гадзін па маскоўскім часе прыйшло ўжо больш за 500 чалавек, падлічыла "Вёрстка". Яны вымушаны стаяць на вуліцы ў чарзе, паколькі брама храма пакуль закрытая.

Пры гэтым, як распавялі гледачы "Дажджу", каля метро дзяжураць паліцыянты і правяраюць дакументы ў людзей з кветкамі. Карэспандэнт SotaVision паведаміла, што на даху шматпавярховага дома насупраць храма дзяжураць людзі ў чорным. Яны адышлі ад краю і схаваліся, калі на іх звярнулі ўвагу.

На месцы таксама дзяжурыць шмат паліцыянтаў. "Калі хтосьці інтэрв'ю будзе браць - фіксуй, карацей", - сказаў адзін з паліцыянтаў камусьці па тэлефоне. У парку ля Барысаўскіх могілак была заўважана конная паліцыя. Барысаўскія могілкі, дзе пройдуць пахаванні, таксама ачэпленыя. Вакол магілы Навальнага дзяжураць сілавікі, а тэрыторыю могілак абгарадзілі агароджай, паведамляе RusNews.

Між тым сваякі Навальнага прыехалі да трупярні а 10 раніцы, калі ім мусілі выдаць цела палітыка. “Цела не выдалі да гэтага часу. Графік пакуль не зрушваецца, але, магчыма, будуць затрымкі”, - паведаміла прэс-сакратар Навальнага Кіра Ярмыш.

Адпяванне Навальнага ў храме ў Мар'іна павінна пачацца а 14:00 па Менску, а пахаванне на Барысаўскіх могілках побач з царквой - а 16:00 па Менску.