Пуцін загаварыў пра бунт праз смерць Навальнага

І запатрабаваў ад ФСБ яго не дапусціць.

Крэмль правёў серыю з нарад з высокапастаўленым генераламі Федэральнай службы бяспекі і МУС пасля смерці ў калоніі за палярным кругам лідара расейскай апазіцыі Аляксея Навальнага, распавялі The Moscow Times дзве высокапастаўленыя крыніцы ў расейскім урадзе.

З іх слоў, пахаванне Навальнага выклікала хваляванне ў вышэйшага кіраўніцтва краіны, нягледзячы на паказальную ўпэўненасць у сабе, якую дэманстраваў прэзідэнт Уладзімір Пуцін.

«Пахаванне Навальнага - стрэс-тэст для расейскай улады. Гэтая тэма была адной з найважнейшых на нарадах з удзелам чыноўнікаў Крамля, генералаў ФСБ і МУС», - сказаў высокапастаўлены расейскі чыноўнік The Moscow Times на ўмовах ананімнасці.

Са слоў крыніцы, спецслужбам пастаўлена задача правесці «аперацыю» «абароны канстытуцыйнага ладу ад пагроз». І важная роля ў ёй адведзеная прапагандзе. «Паставілі задачу не дапусціць карцінку, аналагічную з развітаннем з Андрэем Сахаравым», – кажа чыноўнік. У 1989 годзе на пахаванне савецкага фізіка-дысідэнта, лаўрэата Нобэлеўскай прэміі 1975 года, у Маскве прыйшлі сотні тысяч чалавек.

Паўтарэнне падобнага «кіраўніцтву не патрэбнае», тлумачыць крыніца The Moscow Times: «Таму спецслужбы працуюць паводле свайго плану. А дзяржаўным СМІ была дадзеная каманда забіць эфір у тым ліку выступам прэзідэнта з абяцаннем трыльённых інвестыцый, а таксама апавяданнямі аб тым, што новая эліта - просты народ».

Навальны раптоўна памёр у калоніі «Палярны воўк» у пасёлку Харп у Ямала-Ненецкай аўтаномнай акрузе, куды ён быў этапаваны ў снежні 2023 года і адбываў 19-гадовы тэрмін. ФСВП сцвярджае, што смерць палітыка наступіла з-за тромба, які раптам адарваўся. Паплечнікі апазіцыянера называюць смерць Навальнага забойствам і мяркуюць, што за ім стаіць Крэмль. Улады больш за тыдзень адмаўляліся перадаць цела Навальнага ягонай маці Людміле Навальнай, патрабуючы ад яе не праводзіць публічнае пахаванне.