The Telegraph: Могілкі, звязаныя з элітнымі падраздзяленнямі РФ, значна выраслі ў памерах

Спадарожнікавыя здымкі могілак РФ агалілі «вялікі кошт» вайны ва Украіне.

Спадарожнікавыя здымкі расейскіх могілак агалілі, які насамрэч «велізарны кошт» плаціць войска РФ на вайне ва Украіне. Напрыклад, на адным адрэзку за два гады колькасць магілаў павялічылася ў чатыры разы, піша The Telegraph са спасылкай на заявы экспертаў і фота Maxar Technologies.

Адзначаецца, што на «дзіўных» фатаграфіях відаць, што з моманту пачатку ўварвання ў лютым 2022 года могілкі, звязаныя з элітнымі падраздзяленнямі, такімі як гвардзейская паветрана-дэсантная дывізія, гвардзейская матарызаваная дывізія і група наймітаў «Вагнер», значна выраслі ў памерах.

«Напрыклад, фота ўсяго толькі аднаго адрэзка маскоўскіх Тульскіх могілак паказваюць, што колькасць магілаў вырасла прыкладна ў чатыры разы ў перыяд з кастрычніка 2021 года да красавіка 2023 года. За гэты час на найбліжэйшых Багародскіх могілках быў прыбудаваны зусім новы надзел, які, мяркуючы з усяго, павялічыўся ў тры разы. Абодва знаходзяцца недалёка ад Разані на захадзе Расеі, дзе асталяваныя падраздзяленні 106-й гвардзейскай паветрана-дэсантнай дывізіі. Войскі гэтай дывізіі бралі ўдзел у першых баях вайны на Украіне, а потым удзельнічалі ў аперацыях у раёне Бахмута разам з войскамі «Вагнера», – гаворыцца ў публікацыі.

Паводле ацэнак заходняй выведкі, у баях за Бахмут магло загінуць да 20000 расейскіх вайскоўцаў.

Былы афіцэр выведкі брытанскага войска і спецыяліст планавання NATO палкоўнік Філіп Інгрэм назваў гэтыя фота «дзіўнымі». Яны паказваюць «вялікі кошт, які плацяць расейскія мабілізаваныя», сказаў ён:

«Я не здзіўлены відавочным ростам могілак каля базаў, паколькі ў цяперашні час Расея страчвае больш за 900 вайскоўцаў за дзень пры мінімальных тэрытарыяльных набытках. Сведчаннем таму з'яўляюцца страты расейцаў у бітве за Аўдзееўку, дзе загінула больш за 16 тысячаў іх салдатаў».

Паводле ягоных словаў, рэальнасць для расейцаў такая, што павелічэнне памераў гэтых могілак не поўнасцю адлюстроўвае сапраўдную колькасць загінулых на вайне:

«Многія целы засталіся там, дзе яны ўпалі на полі бою. Акрыянне і рэпатрыяцыя загінулых расейцаў не з'яўляецца прыярытэтам, паколькі гэта раскрые сапраўдныя маштабы ахвяраў… Сёлета, хутчэй за ўсё, агульныя страты абапал дасягнуць мільёна. Я мяркую, што могілкі альбо зноў вырастуць у памерах, альбо давядзецца будаваць новыя».

Выданне дадало, што ацэнкі колькасці расейскіх салдатаў, якія загінулі ў баях ва Украіне, моцна адрозніваюцца.