Украіна палепшыла марскія дроны, якія знішчаюць караблі расейскага флоту
1- 2.03.2024, 10:05
- 5,308
![Украіна палепшыла марскія дроны, якія знішчаюць караблі расейскага флоту](https://i.c97.org/ai/574596/aux-head-1702012370-20231208_magurav5_360.jpg)
Генерал СБУ раскрыў падрабязнасці.
Украіна ўдасканаліла дроны “Марскі малыш”, з дапамогай якіх топіць расейскія вайсковыя караблі. Пра гэта піша выданне Business Insider.
Як распавёў генерал СБУ Іван Лукашэвіч, зараз у спецслужбаў зусім іншыя параметры дронаў.
"Асабліва ў параўнанні з тымі, якія мы ўпершыню выпрабавалі ў кастрычніку 2022 года для нападу на расейскія вайсковыя караблі ў Севастопальскай бухце", – сказаў ён.
"Мы ўсвядомілі хібы гэтых першых праектаў, але вытворца не мог іх прадугледзець, таму што ў той час у свеце не было досведу стварэння такіх высокатэхналагічных дронаў", - адзначыў генерал.
У матэрыяле гаворыцца, што Сілы абароны Украіны выкарыстоўвалі гэтыя марскія беспілатонікі ў шматлікіх аперацыях у акваторыі Чорнага мора. Танныя ў вытворчасці і дыстанцыйна кіраваныя дроны даюць Украіне асіметрычную перавагу перад Расеяй.
Са слоў Лукашэвіча, “Марскі малыш” прайшоў праз тры этапы мадыфікацый:
першы этап - павелічэнне памеру боегалоўкі;
другі этап - паляпшэнне мараходных якасцяў, якое гарантавала магчымасць плавання пры больш высокіх хвалях;
трэці этап - павелічэнне далёкасці дзеяння.
Выданне піша, што цяпер “Марскі малыш” можа пераадолець адлегласць у два разы большую, чым паміж Адэсай і акупаваным Севастопалем.
Лукашэвіч зазначыў, што Украіна таксама хацела зрабіць іх шматразовымі. СБУ выкарыстоўвае некалькі пляцовак для выпрабавання дронаў. Адбываюцца пастаянныя перадыслакацыі, нават спецаперацыі праводзяцца з розных камандных пунктаў у розных раёнах.
"Калі будзе пагроза, мы яе абавязкова знойдзем, лакалізуем і знішчым", — сказаў Лукашэвіч.