Рэдкі медны кінжал узростам 4000 гадоў выявілі ў Польшчы.
8- 2.03.2024, 19:58
- 8,156
Ён мог належаць багатаму воіну.
Шукальнік скарбаў знайшоў медны кінжал узростам 4 000 гадоў у лесе недалёка ад вёскі Каржаніца на паўднёвым усходзе Польшчы. На сённяшні дзень – гэта найстарэйшы артэфакт такога роду, выяўлены на паўднёвым усходзе краіны. Адзіны такі кінжал знаходзілі ў Польшчы ў 1960-х гадах. Таму знаходка стала вялікай неспадзеўкай для навукоўцаў, піша «Хайтек».
Археолагі абследавалі месца, дзе скарбашукальнік знайшоў кінжал, але іншых артэфактаў не знайшлі. Таму звязаць зброю з канкрэтнай археалагічнай культурай магчымасці няма.
Аднак археолагам удалося датаваць кінжал, параўнаўшы яго з аналагічнымі артэфактамі, якія знаходзілі ў Цэнтральнай Еўропе і ўкраінскім лесастэпе. Аналіз паказаў, што кінжал Каржаніца выкарыстоўвалі недзе ў другой палове III тысячагоддзя да нашай эры.
Чалавек, які выкарыстоўваў кінжал, магчыма, быў «ваяром вельмі высокага сацыяльнага статуту», тлумачаць навукоўцы. Аднак малаверагодна, што яго выкарыстоўвалі б у баі. Зброя з медзі даволі мяккая.