Расейцы ракетай патапілі свой карабель «Капітан Лабанаў» у Балтыйскім моры.

СМІ паказалі відэа.

Расейскі траўлер «Капітан Лабанаў» патануў у Балтыйскім моры 19 сакавіка ў выніку трапляння ракеты падчас вучобы Ваенна-марскога флоту УС РФ. Праз памылковы ўдар на караблі адбыўся пажар, і рыбалоўны карабель пайшоў на дно.

Пра гэта паведамляе расейскае выданне «Дождж».

Такую прычыну затаплення «Капітана Лабанава» журналістам пацвердзіў сваяк чальца экіпажу траўлера.

Ён дадаў, што тады на борце карабля ў выніку ракетнага ўдару загінулі тры чалавекі і яшчэ чацвёра атрымалі раненні. Крыніца таксама ўдакладніла, што ракета была выпушчаная падчас вучэнняў расейскага Балтыйскага флоту – яна ўпала на рубку капітана карабля.

Між тым мясцовыя ўлады заяўлялі, што на борце траўлера адбыўся пажар, а прычыны гэтага інцыдэнту пакуль невядомыя. Таксама афіцыйна былі агучаныя звесткі толькі пра адну ахвяру.

«Калі забіралі тых, хто выжыў, усе выдатна ведалі, што загінулі тры чалавекі. І ўсе цудоўна ведалі, што ўдарыла ракета. Але яны пастанавілі напісаць, што адбылося “загаранне”», – паведамляе словы крыніцы «Дождж».

Ён дадаў, што капітанскую рубку «проста знесла».

Ацалелых чальцоў экіпажу скіравалі ў шпіталь у горадзе Піянерск, стан аднаго з іх ацэньваюць як цяжкі.

«Паводле словаў крыніцы, у шпіталі пацярпелых дапыталі супрацоўнікі ФСБ, якія папрасілі чальцоў экіпажу “не распаўсюджвацца” пра інцыдэнт», – гаворыцца ў публікацыі.

Акрамя таго, паведамляецца, што яшчэ адна ракета, выпушчаная на ваенных вучэннях, упала ў рыбалоўныя сеткі побач з прамысловым караблём кампаніі МРТК, які ў той момант быў каля траўлера.

СМІ таксама апублікавалі відэа, як у Балтыйскім моры палаў карабель «Капітан Лабанаў».