У акупаваным Бярдзянску адбылася ўзброеная сутычка паміж расейскімі сілавікамі і вайскоўцамі

«Вайна» паміж дзвюма групамі акупантаў успыхнула ў пачатку сакавіка.

Беззаконне на тэрыторыях Украіны, захопленых расейцамі, узмацняецца. На днях у акупаваным Бярдзянску адбыліся сутычкі паміж расейскімі сілавікамі і вайскоўцамі УС РФ.

Аб здарэнні распавёў расейскі рэсурс ASTRA, спасылаючыся на інфармаваныя крыніцы.

«Вайна» паміж дзвюма групамі акупантаў успыхнула ў пачатку сакавіка. Прычынай стала тое, што расейскія «ДПСнікі» не надта пачціва абышліся з камандзірам узвода УС РФ Артурам Недашкоўскім і нават знайшлі ў яго падробленае пасведчанне. У адказ расейскі афіцэр загадаў падначаленым правучыць сілавікоў.

«Разборкі» здарыліся 4 сакавіка сярод белага дня.

«Супрацоўнікі «ДПС» дзяжурылі на вуліцы Льва Талстога, як у нейкі момант да іх пад'ехаў аўтамабіль «УАЗ», з яго выйшлі ўзброеныя людзі ў камуфляжы і, пагражаючы зброяй, прымусілі супрацоўнікаў «ДПС» здаць іх зброю і легчы на зямлю. Затым на месца пад'ехаў яшчэ адзін аўтамабіль «Хамер», і супрацоўнікам дазволілі ўстаць… За стырном «Хамера» выявіўся камандзір Недашкоўскі», - паведаміў расейскі рэсурс.

У выніку пяцёра падначаленых Недашкоўскага былі арыштаваныя, іх абвінавачваюць у «выкарыстанні гвалту ў дачыненні да прадстаўніка ўлады». Іх камандзір, мяркуючы з усяго, выйшаў сухім з вады.

Адзначым, што Недашкоўскі ёсць у базе ўкраінскага «Міратворца». Рэсурс запэўнівае, што гэты ўраджэнец Крыма ўдзельнічаў у агрэсіі супраць Украіны з 2014 года. Спачатку ён выконваў прапагандысцкія функцыі, а потым пайшоў ваяваць.

«Здраднік Радзімы. Ваенны злачынец. Баявік ПВК «Вагнер». Удзельнік расейска-беларускай ваеннай агрэсіі супраць Украіны 24.02.2022… За знішчэнне г. Бахмута і забойствы грамадзян Украіны ў перыяд з лютага 2022 г. да траўня 2023 г. прадстаўлены да ўзнагароды (Ордэн Мужнасці)», - паведамілі ў «Міратворцы» пра Недашкоўскага.