Украіна атрымае ад ЕЗ амаль 2 млрд еўраў

У траўні.

Віцэ-прэзідэнт Еўракамісіі Валдзіс Дамброўскіс паведаміў, што памер наступнага пасля красавіка траншу макрафінансавай дапамогі для Украіны можа складаць 1,9 млрд еўраў.

Як паведамляе «Еўрапейская праўда», пра гэта ён сказаў у зносінах са СМІ на фоне паседжання Рады ЕЗ у эканамічных і фінансавых пытаннях.

Дамброўскіс нагадаў, што Украіна ў сакавіку ўжо атрымала першы транш з узгодненай праграмы макрафінансавай дапамогі на 50 млрд еўраў Ukraine Facility, і ў красавіку павінна атрымаць 1,5 млрд.

Ён нагадаў таксама пра ўжо ўхвалены Украінай план рэформаў, паэтапнае выкананне якога будзе ўмовай для атрымання наступных траншаў і адначасова будзе набліжаць Украіну да адпаведнасці стандартам ЕЗ у рамках яе еўраінтэграцыйнай працы.

«Што да наступных крокаў: Еўракамісія ацэньвае ўкраінскі план рэформаў з мэтай вызначыць квартальныя індыкатары выканання рэформаў і інвестыцый для разблакавання наступных плацяжоў.

Неўзабаве мы фіналізуем гэтую працу і перадамо ацэнку Радзе ЕЗ. Калі будзе дасягнутае ўзгадненне, гэта адкрые шлях да выплаты Украіне папярэдняга фінансавання памерам 1,9 млрд еўраў, найбольш верагодна – у траўні», – расказаў Дамброўскіс.