Расейскі рубель абрынуўся да мінімуму з кастрычніка

На фоне праблем з валютным прыбыткам у найбуйнейшых экспарцёраў.

Курс даляра на Маскоўскай біржы сёння падняўся вышэй за 94 расейскія руб, дасягнуўшы на піку 94,18 руб/$. Апошні раз даляр каштаваў больш за 94 руб 30 кастрычніка 2023 г. Тады яго курс ішоў уніз: у сярэдзіне кастрычніка ўлады, каб спыніць дэвальвацыю, увялі абавязковую рэпатрыяцыю і продаж валютнага прыбытку экспарцёраў.

Зараз жа ўніз ідзе курс рубля: абавязковы продаж валютнага прыбытку ўжо не дапамагае яму - праз праблемы з разлікамі значная частка экспартнага прыбытку папросту не даходзіць да Расеі, адзначае The Moscow Times.

Гэта адзін з фактараў слабасці рубля цяпер: у лютым-сакавіку экспарцёры «недапрадалі» валюты на 2-3 рублі паводле курса, адзначае кіроўны дырэктар ГПБ Private Banking Ягор Сусін. У сакавіку расейскі экспарт вырас больш чым на $10 млрд у параўнанні з лютым, вынікае са звестак Цэнтрабанка, але яшчэ больш (на $15,5 млрд) павялічыліся замежныя актывы расейскіх кампаній, куды ўваходзяць і сродкі на замежных рахунках.

Аналітыкі SberCIB зважаюць на скарачэнне абарачэння таргоў. Асноўнай валютай разлікаў для расейскіх экспарцёраў і імпарцёраў апошнім часам быў юань. У першай палове красавіка абарачэнні ў пары «рубель/юань» былі на 25% меншымі, чым у сакавіку, вынікае са звестак біржы (поыблізна 108,7 млрд руб за 1-15 красавіка супраць 144,4 млрд у сакавіку). Нізкія абарачэнні азначаюць, што экспарцёры прадаюць нязначныя аб'ёмы валюты, зазначаюць аналітыкі SberCIB.

У другой палове месяца рубель звычайна атрымлівае падтрымку ад падатковага перыяду, але зараз не варта разлічваць на гэты фактар, папярэджвае кіраўнік аддзела інвестыцыйнага кансультавання «Алор брокера» Аляксей Антонаў: «Інвестары напярэдадні травеньскіх святаў упадабаюць павялічыць даляравыя ўкладанні. Будзе таксама падвышаны попыт на гатоўку валюты з боку тых, хто адправіцца на замежныя курорты». Акрамя таго, экспарцёры абавязаныя не толькі прадаваць валютны прыбытак, але і ўзгадняць графік гэтых аперацый - праз гэта продажы сталі больш раўнамернымі, а каляндарны фактар менш выяўленым, адзначалі ўдзельнікі рынку.

Указ прэзідэнта РФ аб абавязковым продажы экспартнага прыбытку дзейнічае да канца красавіка, так што ва ўладаў засталося два тыдні на тое, каб вызначыцца, ці падаўжаць яго дзеянне. Урад, у тым ліку Мінфін, выступаюць за падаўжэнне да канца года, мяркуючы, што ўказ дапамог стабілізаваць курс рубля, Цэнтрабанк - супраць: на яго думку, на рубель уплывае яго грашова-крэдытная палітыка і сітуацыя ў вонкавым гандлі, у тым ліку з разлікамі.

Уплываць на іншую прычыну паслаблення рубля - вывад замежнымі кампаніямі таго, што яны выратавалі ад продажу расейскіх актываў, Мінфін не збіраецца. Міністр Антон Сілуянаў прапануе захаваць ліміт на канвертаванне і вывад валюты $1 млрд за месяц.

ЦБ адзначае «некаторую адаптацыю расейскай эканомікі да ўскладнення разлікаў і лагістыкі»: экспарт аднаўляецца, як і паступленні валютнага прыбытку, але «эфекты ад санкцый могуць яшчэ праявіцца і стрымліваць уплыў на замежны гандаль». Але эксперты ўважаюць адаптацыю недастатковай і чакаюць далейшага зніжэння рубля, асабліва пасля таго, як даляр пераадолеў важны ўзровень супраціву 93,5 руб.

Цяпер рубель можа дэвальвавацца да 97,5 руб/$, пасля чаго, як і год таму, улады могуць актывізаваць захады падтрымкі, мяркуе заснавальнік КК «Ары капітал» Аляксей Траццякоў. Аналітыкі MMI таксама чакаюць падзення рубля да 97-98 руб/$. Рубель устойліва, хоць і плыўна, змяншаецца, канстатуюць яны. Эканаміст Дзмітрый Палявы звяртае ўвагу на па-ранейшаму высокі адток капіталу (па $1,8 млрд у лютым-сакавіку «чыстых памылак і пропускаў» у аплатным балансе).

«На першы погляд, паслабленне рубля здаецца нелагічным: кошты нафты высокія, у красавіку найбуйнейшым экспарцёрам чакаюцца буйныя падатковыя выплаты, - разважае Траццякоў. – Але тыя ж фактары падтрымкі рубля былі і ў сакавіку, але яны не спрацавалі».