Сіноптыкі паабяцалі беларусам «узмоцнены рэактыўны струмень»

Дзе чакаюцца замаразкі да -3°C?

Апошняя дэкада красавіка, на жаль, цеплынёй не пацешыць. На наступным тыдні сіноптыкі паабяцалі беларусам няўстойлівае надвор'е з парывістым ветрам і дажджамі. У некаторых рэгіёнах краіны і зусім пройдзе мокры снег. Сярэдняя тэмпература па краіне чакаецца як мінімум на 2-3°C ніжэйшай за норму.

«Вялікая частка Еўропы ўсяго за некалькі дзён адчуе ўвесь спектр красавіцкіх падзеяў. Узмоцненая рэактыўная бруя з'яўляецца вызначальным фактарам у дастаўцы холаду ў Еўропу», - распавялі спецыялісты Telegram-канала Nadvorie.

У эфіры беларускай тэлевізіі сіноптык Дзмітры Рабаў адзначыў, што ў пачатку тыдня працэсамі надвор'я ў Беларусі будзе кіраваць «актыўны паўднёвы цыклон». Гэта значыць, што ў большасці раёнаў пройдуць дажджы, а ўначы і раніцай - мокры снег. Вільготнасць чакаецца высокая, да 90%. Вецер паўночна-заходні, сярэдні, часам парывісты. Тэмпература раніцай не будзе перавышаць +5°C у краіне.

У сярэдзіне тыдня ўплываць на надвор'е будзе ўсё той жа паўднёвы цыклон і «звязаныя з ім атмасферныя франты». Са слоў Дзмітрыя Рабава, у цёмны час дня на поўдні краіны чакаюцца кароткачасовыя дажджы. А вось удзень узяць парасон лепш усім беларусам, бо ападкі пройдуць практычна па ўсёй краіне. Сіноптык адзначыў, што ў сярэдзіне тыдня паветра прагрэецца максімум да +12°C.

Паводле звестак Белгідрамета, у панядзелак, 22 красавіка, будзе пахмурна з прасвятленнямі. І калі па ўсёй Беларусі пройдуць слабыя кароткачасовыя дажджы, то ўначы ў Гомельскай і Менскай абласцях сіноптыкі паабяцалі «моцныя ападкі». Тэмпература паветра ў цёмны час дня будзе вагацца ад +1 да +7°С, а ўдзень чакаецца ад +3°С да +10°С. У некаторых месцах на поўдні і паўночным усходзе Беларусі стане цяплей да +13°С.

У аўторак уначы, 23 красавіка, надвор'е ў паўночных рэгіёнах Рэспублікі будзе вызначаць «няўстойлівая паветраная маса». Сонца чакаць не варта, па ўсёй краіне будзе пахмурна. Уначы і раніцай на асобных адцінках дарог магчымая галалёдзіца, папярэдзілі сіноптыкі. Слупок тэрмометра ў цёмны час дня не паднімецца вышэй за +6°С, а на захадзе і зусім чакаюцца замаразкі: уначы тэмпература апусціцца да -3°С. Удзень у аўторак чакаецца ад +7°С на поўначы да +15°С на поўдні, расказалі ў Белгідрамеце.