Reuters: Санкцыі прымусілі Маскву ісці на экстранны захад

У Расеі пачынаюць закрываць буйныя заводы.

Санкцыі Захаду працягваюць аслабляць расейскую эканоміку, прычыняючы ўсё большую шкоду Маскве. Расейскі металургічны гігант «Нарнікель» пастанавіў закрыць медны завод у расейскай частцы Арктыкі і пабудаваць новы ў Кітаі пасля адмовы заходніх партнёраў пастаўляць дэталі. Аб гэтым заявіў генеральны дырэктар кампаніі Уладзімір Патанін, піша Reuters.

Патанін заявіў у інтэрв'ю дзяржаўнаму СМІ «Інтэрфакс», што горназдабыўная кампанія плануе замяніць медзеплавільныя магутнасці на Надзеждзінскім заводзе ў расейскай Арктыцы новымі магутнасцямі ў Кітаі пачынаючы з 2027 года.

Расейскі алігарх прадставіў падрабязную справаздачу аб тым, як заходнія санкцыі блакуюць экспарт сыравінных тавараў. Патанін падкрэсліў, што праз санкцыі даходы Нарыльска абрынуліся як мінімум на 15% з 2022 года, а менавіта, праз цэлы шэраг цяжкасцяў, звязаных з міжнароднымі выплатамі, адмовамі ад паставак і цэнавымі зніжкамі, а таксама праз праблемы з планамі скарачэння забруджвання сярністым газам на медных заводах.

Са слоў Патаніна, Пуцін ужо пацвердзіў гэтыя намеры. Гэтае пытанне ўключанае ў парадак дня «расейска-кітайскіх сустрэч» на вышэйшым узроўні - відавочная спасылка на запланаваную паездку Пуціна для сустрэчы з кітайскім лідарам Сі Цзіньпінам у канцы гэтага года.

Патанін сказаў, што ціск санкцый прымусіў Нарыльск «задумацца аб правільным спосабе дастаўкі нашых тавараў на рынак» і прыняць пастанову «перамясціць іх туды, дзе яны будуць спажывацца, а канчатковы прадукт будзе прадавацца як кітайскі».

«На кітайскі тавар значна складаней накласці санкцыі ў Кітаі, чым на расейскі, які пастаўляецца ў Кітай», - дадаў ён.

Патанін мяркуе, што новы план абароніць экспарт Нарыльска ад ціску ЗША на фінансавыя аперацыі з Расеяй.

«Разлікі - адно з самых жорсткіх месцаў нават у дружалюбных юрысдыкцыях, яны не даюць нармальна працаваць экспарцёрам і імпарцёрам, - падкрэсліў ён. - Кампаніі неабходна пазбегнуць рызыкі спынення аперацый праз праблемы з разлікамі».