Лукашэнка адмовіўся верыць, што ў Беларусі няма буйных радовішчаў нафты

Дыктатар загадаў новаму кіраўніку Мінпрыроды «капаць і шукаць».

Аляксандр Лукашэнка запатрабаваў ад новага міністра прыродных рэсурсаў і аховы навакольнага асяроддзя Сяргея Масляка знайсці нафту і карысныя выкапні ў краіне.

«Скажу проста: трэба капаць і шукаць. Акрамя гэтага, трэба, каб ты прымусіў усіх у гэтым кірунку працаваць. Я не веру, што ў нашых нетрах няма таго, што нам патрэбна. Вось калі хоць у нейкай ступені вырашыш гэтую задачу - гэта помнік можна ставіць у кожным месцы», - цытуе БелТА ўзурпатара.

Лукашэнка зазначыў, што не верыць у тое, што ў Беларусі няма буйных нафтавых радовішчаў.

Ён дадаў, што ў сферы выведкі і здабычы нафты ў краіне працуе толькі адна кампанія, але нягледзячы на добрыя паказчыкі, ёй неабходная канкурэнцыя. «Не мы прыдумалі - канкурэнцыя павінна быць. Трэба больш меркаванняў, больш уражанняў і іншае», - сказаў на заканчэнне Лукашэнка.