Шольц забараніў Пуціну спасылацца на Канта

У Расеі назвалі філосафа "расейскім трафеем".

Канцлер Нямеччыны Олаф Шольц заявіў, што крамлёўскі правадыр Пуцін не мае права спасылацца ў сваіх выступах на нямецкага філосафа Імануіла Канта.

На цырымоніі з нагоды 300-годдзя з дня нараджэння Канта канцлер сказаў, што агрэсіўная вайна Расеі супраць Украіны супярэчыць усім фундаментальным выказванням філосафа.

“У Пуціна няма ніякіх падстаў спасылацца на Канта. Тым не менш, пуцінскі рэжым па-ранейшаму імкнецца прысвоіць Канта і яго працы практычна ўсялякай цаной”, - цытуе Шольца Zeit.

Паводле ягоных слоў, ідэі Канта аб правах чалавека і чалавечай годнасці, а таксама яго думкі аб вайне і міры не могуць спалучацца з вайной і з тым, што Пуцін практыкуе ў сваёй краіне.

“Расейскія напады і разбурэнні ва Украіне сімвалізуюць імкненне да знішчэння, якое мала хто з нас у Еўропе XXI стагоддзя разглядаў бы як магчымае праз сваю празмернасць”, - дадаў палітык.

Раней губернатар Калінінградскай вобласці Антон Аліханаў заявіў, што Кант гэта "рсейскі трафей, як і ўсё ў Калінінградскай вобласці".