Каманда РФ у хакеі перад спарынгамі з беларусамі занізіла ўзрост сваіх гульцоў

Цуды бухгалтэрыі.

У траўні нацыянальная каманда ў хакеі правядзе чатыры таварыскія матчы супраць расейцаў. Супраціўнік беларусаў называецца «Расея 25», але ў складзе гэтай каманды стае гульцоў і старэйшага ўзросту, піша zerkalo.io.

4 траўня каманда Беларусі згуляе з Расеяй на турніры ў Астане. Потым каманды правядуць спарынгі ў Омску (6 траўня), Туле (9 траўня) і Менску (11 траўня). Кіраваць расейцамі будзе галоўны трэнер пецярбуржскага СКА Раман Ратэнбэрг.

Афіцыйна супраціўнік беларусаў называецца "Расея 25". Гэта значыць мяркуецца, што ў камандзе ўсе хакеісты не старэйшыя за 25 гадоў. Але калі вывучыць ростар расейцаў, то можна налічыць адразу 11 гульцоў, якія перавысілі планку.

Гэта брамнік Мікіта Серабракоў (28 гадоў), абаронцы Арцём Зямчонак (32) і Мікіта Камалаў (28), нападнікі Валянцін Зыкаў (28), Васіль Глотаў (26), Міхаіл Вараб'ёў (27), Сяргей Талчынскі (29), Артур Цянулін ( 27), Мікіта Дыняк (26), Уладзіслаў Барулін (27) і Максім Джыашвілі (28).