Сіноптыкі паабяцалі беларусам на выходных ад -1°C да +22°С

Калі спыняцца дажджы і прыйдзе паўднёвы цыклон?

Белгідрамет падзяліўся прагнозам надвор'я на 26 красавіка і надыходзячыя выхадныя, 27 і 28 красавіка. Яркага сонца не паабяцалі, але затое будзе пацяпленне, хаця і ў суправаджэнні дажджоў да нядзелі.

Спецыялісты Telegram-канала Nadvorie расказалі аб прыходзе цёплага фронту чарговага паўднёвага цыклону.

Сіноптыкі спрагназавалі «вельмі інтэнсіўныя дажджы» раніцай 26 красавіка ў Гомельскай і Магілёўскай абласцях. «У Гомельскай вобласці яны пачнуцца ўжо сёння [25 красавіка] а сёмай — да васьмі гадзін вечара», — напісалі ў крыніцы.

Там таксама паведамілі, што «тэрыторыя Беларусі апынецца ў зоне цёплага фронту чарговага паўднёвага цыклону Н2». У Менску ж і на захад ад яго «асаблівых ападкаў не чакаюць».

Паводле звестак Белгідрамета, 26 красавіка ў Беларусі будзе воблачнае з прасвятленнямі надвор'е. Ва ўсходняй частцы краіны пройдуць дажджы, а ўначы на паўднёвым усходзе - моцныя дажджы. А ўдзень у асобных раёнах прагрымяць навальніцы. Раніцай і ўначы - месцамі туман.

Белгідрамет таксама спрагназаваў няўстойлівы слабы вецер у начны час, удзень - ад слабога да сярэдняга. Уначы слупок тэрмометра паднімецца на паўднёвым усходзе да +11°С, аднак месцамі на захадзе чакаюцца замаразкі да -1°С. Тэмпература паветра ўдзень складзе ад +9 да +15°С, а ва ўсходніх раёнах - да +19°С. Агулам надвор'е ва ўсходняй частцы Беларусі ў гэты дзень будуць вызначаць атмасферныя франты.

А 27 красавіка на варункі надвор'я на паўночным усходзе краіны паўплывае малаактыўны франтальны раздзел. Сіноптыкі спрагназавалі пераменную воблачнасць, кароткачасовыя дажджы ў паўночна-ўсходняй частцы Беларусі ўначы, а таксама слабы туман у начны час і раніцай.

Тэмпература паветра ўначы ў суботу складзе ад +1 да +7°С, месцамі замаразкі да -2°С, а вось ўдзень паветра прагрэецца да +19°С.

Паводле прагнозу Белгідрамета, 28 красавіка надвор'е будзе фармаваць вобласць павышанага атмасфернага ціску і цёплая паветраная маса, якая ідзе з паўднёвага захаду Еўропы. Чакаецца пераменная воблачнасць, пераважна без ападкаў. Як і ў папярэднія дні, уначы і раніцай у асобных раёнах, паводле прагнозу сіноптыкаў, слабы туман. Вецер жа будзе сярэдні.

Як расказалі ў Белгідрамеце, уначы тэмпература паветра складзе ад +2 да +8°С, удзень — ад +15 да +22°С.