«Беларуская выведка»: «Ганаровыя консулы» дапамагаюць лукашэнкаўскай агентуры ў ЕЗ

І выконваюць шэраг іншых выведвальных функцый.

Telegram-канал «Беларуская выведка» піша, што трафік у інтарэсах спецслужбаў з тэрыторыі Беларусі ў ЕЗ і назад (перамяшчэнне праз мяжу носьбітаў адчувальнай інфармацыі, элементаў асаблівай мікраэлектронікі, падтрыманне сувязі з агентурай і іншыя выведвальныя функцыі) ажыццяўляецца беларускімі "ганаровымі консуламі" і іх сем'ямі.

Наяўнасць выдадзеных МЗС РБ дыпламатычных пашпартоў, а часам проста беларускіх чырвоных дыпнумароў серыі СС, дазваляе гэтым суб'ектам бесперашкодна перасякаць без надгляду мяжу ЕЗ і, карыстаючыся дыпламатычным прыкрыццём, выконваць "даручэнні" беларускіх спецслужбаў.

“Нам дакладна вядома, што асобы, якія намінуюцца на пасады ганаровых консулаў у Беларусі, акрамя працэдуры ўзгаднення ў МЗС, праходзяць спецправерку і ўзгадненне ў КДБ. Нагадаем, што гаворка ідзе толькі пра грамадзян РБ, якія ўмела выкарыстоўваюць прадстаўлены дыпламатычны “дах”. Цяпер 100% ганаровых консулаў прайшлі нанава “аператыўную праверку” і пераатэстацыю КДБ і выказалі жаданне “дапамагаць краіне”. Гаворка ідзе пра сотні "дыпламатаў", якія ажыццяўляюць рэгулярнае перамяшчэнне на аўтатранспарце праз літоўскую або польскую межы ў асабістых мэтах, пры гэтым выконваючы некаторыя асобныя даручэнні для КДБ.

Многія з іх паспяхова пастаянна пражываюць на тэрыторыі ЕЗ, выконваючы працу на КДБ на прафесійнай аснове (пад афіцыйным прыкрыццём) з прычыны недахопу дыпламатаў у беларускіх пасольствах і консульствах у ЕЗ”, - піша Telegram-канал