Байдэн правёў «адкрытую і канструктыўную» тэлефонную размову з Сі

Што абмяркоўвалі.

Тэлефонная размова Джозэфа Байдэна і Сі Цзіньпіна адбылася ўчора раніцай, 2 красавіка. Прэзідэнт ЗША закрануў у размове такія тэмы як барацьба з наркагандлем, канфлікт на Блізкім Усходзе, ядзерная праграма КНДР і дапамога КНР Расеі ў вайне супраць Украіны.

Амерыканскія чыноўнікі заявілі, што тэлефонная размова мела на мэце не дыскутаваць, а праверыць лідара Кітая, інфармуе рэсурс CNN.

Байдэн хацеў дабіцца гэтай размовай канкрэтных вынікаў. Са слоў Джона Кірбі, размова была «адкрытая і канструктыўная». Была закранутая тэматыка несправядлівай гандлёвай палітыкі і неправамернага затрымання грамадзян ЗША у Кітаі.

Сама ж тэлефонная размова адбылася на фоне будучай паездкі кіраўніка Мінфінансаў і Дзярждэпа ЗША ў Пекін. Абодва амерыканскія чыноўнікі ўжо былі ў Кітаі ў 2023 годзе, каб наладзіць стасункі паміж краінамі.

З лета 2023 года Байдэн і Сі спрабуюць звесці да мінімуму ўсе канфліктныя сітуацыі паміж ЗША і КНР.

Ініцыятарам учорашняй тэлефоннай размовы стаў Байдэн. Ён хацеў растлумачыць сітуацыю наконт агрэсіі КНР у Ціхаакіянскім рэгіёне і Тайвані.

Вашынгтон заклікаў Пекін утаймаваць караблі берагавой аховы, якія абстрэльваюць з вадамётаў гандлёвыя караблі з Філіпін.

Сі заявіў, што Тайвань - гэта першая "чырвоная лінія", якую нельга перасякаць у стасунках паміж ЗША і КНР. Аднак Байдэн заявіў, што калі Кітай сілай паспрабуе далучыць Тайвань, то Вашынгтон будзе на баку Тайбэя.

Раскрытыкаваў Сі і санкцыі, якія ЗША ўводзяць супраць эканомікі Кітая.

Абмеркавалі лідары краін і TikTok. У Вашынгтоне абураныя тым фактам, што кампаніяй валодае Кітай, які не збіраецца прадаваць яе ў прыватныя рукі.

У тэлефоннай размове Байдэн даў зразумець Сі, што Пекін не павінен дапамагаць РФ аднаўляць яе ваенна-прамысловую базу. Пасля ўвядзення санкцый з боку Захаду Крэмль шукае магчымасць знайсці акно, адно з якіх - Кітай.

Абмеркавалі і падзеі ў Чырвоным моры. Кіраўнік Белага дома заклікаў Сі ўтаймаваць хусітаў.