Новае відэа ўдару па НПЗ у Туапсэ: пашкоджанні былі значна сур'ёзнейшымі

Выведзеная з ладу найбольш важная ўстаноўка.

У Сеціва патрапіла новае відэа ўдару ўкраінскага дрона па Туапсінскім нафтаперапрацоўчым заводзе (НПЗ) раніцай 17 траўня.

Мяркуючы з яго, наступствы нападу могуць быць значна больш сур'ёзнымі, чым меркавалася раней.

Відавочца зняў на камеру, як украінскі дрон даволі павольна і без перашкод набліжаецца да НПЗ і атакуе яго. Камера зафіксавала паўторны прылёт, бо завод у гэты момант ужо моцнага гарыць.

«Не спяшаючыся, як у сябе дома. Вельмі дакладна. Даслоўна можна выбіраць канкрэтны пункт і нішчыць самыя крытычныя часткі заводаў і станцый», - пракаментаваў відэа вайсковы аглядальнік Ігаль Левін.

Агенцтва Reuters сцвярджае, што Туапсінскі НПЗ экстрана спыніў працу пасля дронавага ўдару.

Журналісты, абапіраючыся на кадры ўдару, выказалі здагадку, што атакаваная ўстаноўка вытворчасці звадкаванага газу, а не больш важная ўстаноўка перапрацоўкі сырой нафты.

«Падчас пажару не было чорнага дыму. Гэта азначае, што гарэў толькі газ», - гаварылася ў артыкуле.

Аднак у новым відэа выразна бачна, што пасля паўторнага нападу з завода пачаў валіць менавіта чорны дым. Гэта значыць, вялікая імавернасць пашкоджання крытычна важнай для вытворчасці ўстаноўкі перапрацоўкі сырой нафты. Калі яна выведзеная з ладу, НПЗ не зможа працаваць як мінімум некалькі месяцаў.