Супрацоўніца EPAM Кацярына Глінская пасля вызвалення пакінула Беларусь

Дзяўчына на прысуд лукашыстаў правяла два гады ў калоніі.

Супрацоўніца EPAM Кацярына Глінская, якую ў кастрычніку 2022 года прыгаварылі да 2 гадоў калоніі за грубае парушэнне парадку (артыкул 342 КК), з'ехала з Беларусі. Пра гэта яна паведаміла ў сваім інстаграме.

«Прывітанне, дзівосны новы свет! Я вярнулася з апраметнай! Цяпер я ведаю, што такое пекла! Месца, дзе дэманы вучацца маліцца», - напісала яна.

Паводле інфармацыі «Вясны», з калоніі яна выйшла ў красавіку. Мяркуючы з сацсетак дзяўчыны, зараз яна ў Вільні, піша «Медиазона».

14 кастрычніка 2022 года суд Партызанскага раёна Менска прыгаварыў Глінскую да двух гадоў калоніі паводле абвінавачання ў грубым парушэнні парадку (артыкул 342 КК). У ліпені 2022 года відэа з супрацоўніцай IT-кампаніі EPAM, якая вярнулася з Літвы, апублікаваў праўладны тэлеграм-канал.

Сілавікі затрымалі яе разам з сястрой Юліяй, якую арыштавалі на 15 дзён. Паводле якога артыкула, не ўдакладнялася.