Беларус спраўна плаціў 6500 рублёў падаткаў на год, але ўсё адно стаў «дармаедам»

Як так выйшла?

Беларус дыстанцыйна працуе на юрыдычную асобу ў РФ з невялікага беларускага горада. Два месяцы таму з камунальнай квітанцыі ён даведаўся, што апынуўся ў спісе дармаедаў, піша devby.io.

Ён не ІТ-спецыяліст, а метадыст онлайн-адукацыі, аднак гэта ўсё адно: гісторыя можа стаць тыповай і для ІТ.

Ён працуе паводле дамовы цывільна-прававога характару (ЦПХ) дыстанцыйна ў расейскай арганізацыі, заробак афіцыйна атрымлівае на банкаўскую картку. Штогод запаўняе падатковую дэкларацыю і плаціць 13% падаходнага падатку ў Беларусі. Так, за апошні год выйшла блізу 6500 BYN. Аднак два месяцы таму ён апынуўся ў спісе незанятых у эканоміцы.

У камісіі садзейнічання занятасці патлумачылі: гэта таму, што «ЦПХ не з'яўляецца кантрактам ці працоўнай дамовай».

- У пачатку года мая дамова з выпіскай аб заробку ўсіх задавальняла, а цяпер яна ўжо не падыходзіць, - скардзіцца беларус. - Яны нават не захацелі зазіраць у тыя дакументы, якія я прынёс. Начальніца аддзела (ці гэтай камісіі) увогуле сказала, што ім без розніцы, куды плацяцца падаткі.

Няма кантракту або працоўнай дамовы - значыць, дармаед. Але кантракт са мной могуць укласці толькі, калі я буду жыць у РФ.

У інспекцыі падаткаў і збораў чытачу таксама нічым не дапамаглі.

— Там адказалі, што могуць толькі выдаць даведку аб выплачаных падатках, а чаму я стаў дармаедам, яны і самі не ведаюць.

Атрымліваецца, грамадзянін Беларусі жыве ў Беларусі, працуе і плаціць дзве тысячы даляраў па курсе ў бюджэт Беларусі, але пры гэтым з'яўляецца…дармаедам.

Чалавек у аблвыканкаме інкогніта параіў фіктыўна ўладкавацца на працу. Але гэта ж маразм! Што рабіць?

Хлопцу параілі звярнуцца ў камісію не вусна, а пісьмова, прыклаўшы даведку аб выплачаных падатках, але не факт, што гэта дапаможа. Справа ў тым, што з 1 лютага 2024 года набыла моц большая частка раздзелаў пастановы Саўміна № 53, якая яшчэ больш узмацніла крытэрыі аднясення грамадзян да незанятых у эканоміцы. Так, да людзей, якія працуюць на тэрыторыі краін ЕАЭС, зараз адносяць толькі тых, з кім укладзеная працоўная дамова (кантракт). Дагэтуль было дастаткова дамовы ЦПХ - пры ўмове, што па ёй выплачваецца даход.

Магчыма, сэнс быў у тым, каб адсеяць са спісу занятых тых, хто знаходзіцца за мяжой на «вольным хлебе». Аднак жа патрапілі і тыя, хто не толькі жыве і працуе ў краіне, але і сумленна плаціць тут падаткі.

Каго яшчэ могуць закрануць папраўкі?

Айцішнікаў, якія працуюць на РФ і іншыя краіны ЕАЭС паводле дамовы ЦПХ. Такіх нямала. Аднак для іх, здаецца, пакуль ёсць выйсце - пераходзіць на падатак на прафесійны прыбытак (НПД). Падаткавікі не раз тлумачылі, што артыкул 7 «аб працы праз Інтэрнэт» (Закон РБ ад 30.12.2022 № 230-З» аб змяненні законаў у пытаннях падаткаабкладання») прыдуманы якраз для іх. Што рабіць тым дыстанцыйшчыкам, чыя дзейнасць не падпадае пад НПД, незразумела.