Праз недахоп тэхнікі расейцы стварылі чарговы «Франкенштэйн»

У «цар-хлява» з'явіўся канкурэнт.

Ва ўмовах цяжкіх баёў і буйных страт на перадавой, расейскія акупанты ўсё часцей звяртаюцца да самаробнага «паляпшэння» наяўнай тэхнікі. Мабыць, найболей экзатычным такім прыкладам стаў старэнькі УАЗ СГР, у прастамоўі «буханка», пераабсталяваны ў РСЗА.

Відэа выкарыстання такога «магутнага» агнявога сродку падтрымкі зʼявілася ў Telegram-каналах расейскіх прапагандыстаў. Мабыць, адзіным плюсам гэтага паляпшэння стала мабільнасць пускавой устаноўкі РСЗА «Град». Да прыкладу, існуе партатыўны варыянт ракетнай устаноўкі, так званы «Град-П», які ўяўляе з сябе пераносную трубу з якой можна пускаць 122-мм рэактыўны набой. У параўнанні з ім «РСЗА» на базе «Буханкі» выглядае лепш – бо можна везці, а не несці набой на сабе.

Разам з тым мяркуючы па відэа на той жа «Буханцы» змантаваныя накіроўваючыя для пуску, у лепшым выпадку, усяго двух рэактыўных набояў. Гэта лепш, чым 1 «Град-П», але відавочна мала для агнявой падтрымкі пяхоты. У самога «Града» колькасць набояў, якія можа выпусціць устаноўка, складае 40 адзінак.