Еўрапейская камісія абвясціла пра павышэнне коштаў шэнгенскіх віз

Колькі давядзецца плаціць беларусам з 11 чэрвеня?

Еўрапейская камісія пастанавіла павялічыць плату за выдачу шэнгенскай візы для кароткатэрміновага знаходжання (віза тыпу С) на 12%. Пра гэта паведаміла Міністэрства замежных і еўрапейскіх спраў Славеніі.

Як распавялі ў ведамстве, новы кошт пачне дзейнічаць 11 чэрвеня 2024 года. Для дарослых збор за выдачу складзе 90 еўра (315,2 беларускіх рублі паводле курсу Нацбанка на 21 траўня), для дзяцей ад 6 да 12 гадоў - 45 еўра (157,6 рубля). Для дзяцей да 6 гадоў атрыманне шэнгенскай візы бясплатнае.

Віза тыпу С прадугледжвае знаходжанне ў краіне Еўрапейскага звязу (ЕС), дзе дзейнічае Шэнгенскае права, не больш за 90 дзён на працягу ўсялякага перыяду на 180 дзён. Агулам жа, плата за шэнгенскую візу залежыць ад яе тыпу і краіны, якая выдае візу.

«Цяпер для беларусаў няма ніякіх змен кошту віз», - пракаментавалі змену коштаў парталу Tochka.by у прэс-службе амбасады Францыі ў Менску.

Аднак там дапоўнілі, што інфармацыю аб змене платы за шэнгенскія візы апублікуюць 22 траўня ў афіцыйным часопісе ЕЗ.

Як адзначыла выданне The Economic Times, падвышэнне коштаў было пасля перагляду візавых збораў у снежні 2023 года, які праводзяць раз на тры гады. Прычынамі павелічэння збораў у ЕЗ назвалі інфляцыю і заробкі дзяржаўных службоўцаў. Апошняе падвышэнне было ў лютым 2020 года, калі камісіі выраслі з 60 да 80 еўраў.