Грэцыя і Польшча заклікалі Еўракамісію стварыць «Жалезны купал» над Еўропай

Уршуля Фон дэр Ляен выказала ўхвалу гэтай ідэі.

Пагроза, развязаная Расеяй вайна і канфрантацыя з Захадам, прымусіла лідэраў краін Старога Свету задумацца аб супольнай абароне. А няспынныя абстрэлы ракетамі мірных украінскіх гарадоў падказалі і першачарговыя меры ў рамках агульнай абароны.

Прэм'ер-міністры Грэцыі і Польшчы Кірыякас Міцатакіс і Дональд Туск прапанавалі старшыні Еўракамісіі Уршулі фон дэр Ляен ініцыяваць стварэнне агульнай сістэмы супрацьпаветранай абароны, якая фінансавалася б з агульнага бюджэту ЕЗ. Звязу патрэбна "флагманская праграма", такая як паветраны шчыт, напісалі яны ў лісце; пра гэта Bloomberg распавёў знаёмы са зместам чалавек.

Міцатакіс узняў гэтае пытанне на перамовах з Тускам у красавіку, паведаміў агенцтву прадстаўнік урада Грэцыі, пацвердзіўшы змест ліста. У ім лідары дзвюх краін прапануюць стварыць паўнавартасную сістэму супрацьпаветранай абароны для абароны агульнай паветранай прасторы ЕЗ ад замежных пагроз, такіх як самалёты, ракеты і дроны, гаворыцца ў лісце.

Фон дэр Ляен выказала ўхвалу гэтай ідэі. Яна напісала ў допісе ў X (былы Twitter):

«Украіна ваюе за нашыя каштоўнасці. Давайце падтрымліваць Украіну і адначасова ўмацоўваць сваю абарону. Нам трэба менш фрагментацыі і [больш] супольных праектаў. Такіх як паветраны шчыт, прапанаваны Міцатакісам і Тускам».

Лідары Грэцыі і Польшчы заклікалі абмеркаваць гэтую ідэю на наступным саміце лідараў ЕЗ у канцы чэрвеня.

З аналагічнай ідэяй у канцы сакавіка выступіў Армін Папергер, генеральны дырэктар нямецкай Rheinmetall - найбуйнейшага вытворцы ўзбраенняў у Еўропе. Еўрапейскім лідарам варта падумаць аб усталёўцы ракетных сістэм малога радыусу дзеяння для абароны межаў ЕЗ ад удараў звонку ракетамі і дронамі, сказаў ён у інтэрв'ю Financial Times: «Думаю, гэта добрая ідэя – мець еўрапейскае развязанне паводле аналогіі з [ізраільскім] “Жалезным купалам”.