Расейскія вайскоўцы выпусцілі на Белгародскую вобласць яшчэ чатыры бомбы ФАБ

За два дні.

Расейская баявая авіяцыя скінула на Белгародскую вобласць яшчэ чатыры фугасныя авіяцыйныя бомбы (ФАБ) за два дні, распавялі тэлеграм-каналу Astra крыніцы ў экстраных службах рэгіёну.

Паводле іх звестак, 22 траўня каля жылога дома на вуліцы Лясной у вёсцы Ясныя Зоры Белгародскага раёна знайшлі ФАБ-250. Жыхароў вуліцы эвакуавалі.

На наступны дзень, 23 траўня, ФАБ-250 упала на тэрыторыю паляўнічай гаспадаркі ў пасёлку Паляна ў Шабекінскай гарадской акрузе. У гэты ж дзень яшчэ дзве ФАБ-500 былі знойдзены ля вёскі Прысцень у гэтай жа акрузе. У аніводным выпадку пацярпелых не было.

Да гэтага расейскія бомбы падалі на прыгарад Белгарада ў дзень падзення шматпавярховіка - 12 траўня. Дзве ФАБ-500 упалі на пасёлак Разумнае-54 з розніцай восем гадзін. Месца падзення бомбаў было размешчанае менш чым за 8 км ад дома па вуліцы Шчорса, 55А, у якім у той жа дзень у выніку трапляння боепрыпасу абрынуўся пад'езд. Абедзве ФАБ закапаліся ў зямлю і не разарваліся.

4 траўня расейскі самалёт упусціў на Белгарад ФАБ-500, у выніку чаго 7 чалавек былі паранены, 31 домаўладанне і 10 аўтамабіляў атрымалі пашкоджанні. Улады прычыну падзення бомбы стаілі і не прызналі, што яна была расейскай.

З падлікаў The Insider, у 2024 годзе на тэрыторыі Белгарадскай вобласці 39 разоў фіксаваліся няштатныя падзенні расейскіх авіябоепрыпасаў: 38 розных мадыфікацый ФАБ і адной ракеты Х-59. Як мінімум двойчы ФАБ падалі ў Белгарадзе.

Усяго, паводле падлікаў Astra, за апошнія тры месяцы Расея выпусціла на свае рэгіёны і акупаваныя тэрыторыі Украіны 59 ФАБ.