Якім будзе надвор'е ў Беларусі ў апошнія выходныя траўня

Чакаюцца навальніцы.

Калі ў суботу ў Беларусі яшчэ чакаюцца навальніцы, то ў нядзелю - толькі невялікія дажджы, а да панядзелка ападкі павінны спыніцца, расказалі ў Белгідрамеце. На суботу, 25 траўня, абвешчаны жоўты ўзровень небяспекі праз навальніцы і вецер. Будзе горача.

У суботу, 25 траўня, у Беларусі прагназуецца пераменная воблачнасць. Уначы месцамі ў заходніх раёнах, удзень у заходняй палове краіны пройдуць кароткачасовыя дажджы. У асобных раёнах прагрымяць навальніцы. Тэмпература паветра ўначы ад +7°С на паўночным усходзе да +16°С на захадзе краіны, максімальная ўдзень +21...27°С. Атмасферны ціск істотна не зменіцца. Вецер паўднёва-ўсходні сярэдні, удзень пры навальніцах моцны парывісты.

У нядзелю, 26 траўня, чакаецца ўдзень пераважна без ападкаў, толькі ўначы месцамі на захадзе пройдуць невялікія кароткачасовыя дажджы. Уначы і раніцай у асобных раёнах слабы туман. Тэмпература паветра ўначы +6...13°С, на захадзе краіны да +16°С, удзень +23...28°С. Вецер усходні слабы да сярэдняга.

А ўжо ў панядзелак, 27 траўня, не чакаецца і кароткачасовых дажджоў. Уначы і раніцай месцамі слабы туман. Тэмпература паветра ўначы +8...13°С, месцамі да +15°С, удзень +23...28°С. Вецер усходні слабы да сярэдняга.