Расейцы скупляюць нерухомасць у Беларусі

Устаноўлены рэкорд з 2015 года.

За 1 квартал 2024 года продаж фізічнымі асобамі-рэзідэнтамі РБ аб'ектаў нерухомасці нерэзідэнтам склаў 29,6 млн. USD у экв. Гэта рэкордны паказчык актыўнасці ў 1 квартале за дзесяцігоддзе – з 2015-га. У параўнанні з папярэднім годам абʼём замежных укладанняў у беларускую нерухомасць вырас на 24,2%, піша banki24.by.

Так, за 1 квартал 2023-га фізічныя асобы сінявокай прадалі нерэзідэнтам нерухомасць на 23,9 млн USD, за аналагічны квартал 2022 года – на 20,6 млн USD, 2021 года – на 13,5 млн USD, 2020 года – на 19,6 млн USD, 2019 года – на 17,2 млн USD, 2018 года – на 15,6 млн USD, 2017 года – на 14,6 млн USD, 2016 года – на 15,0 млн USD, 2015 года – на 18,3 млн USD.

Рэкорд продажу нерухомасці нерэзідэнтам адзначаўся ў 2014 годзе – 39,9 млн USD за 1 квартал. Атрымліваецца, студзень-сакавік гэтага года выйшаў на ганаровае другое месца (паводле звестак кадастравых агенцтваў).

Хутчэй за ўсё, на фоне санкцый і контрсанкцый усплёск актыўнасці ў пачатку 2024 года адбыўся дзякуючы продажу нерухомай маёмасці асобам з дружалюбных краін. Найбольш прыдатным кандыдатам выступаюць рэзідэнты Расейскай Федэрацыі.

Ёсць яшчэ адзін факт: у 2022 годзе нерэзідэнты развілі найбуйнейшую актыўнасць па скупцы нерухомасці ў 4 квартале. За тыя 3 месяцы замежныя жыхары атрымалі ад рэзідэнтаў РБ квадратныя метры на 107,9 млн. USD. Гэтая сума істотна большая за пакупкі, адлюстраваныя за тры папярэднія кварталы (75,9 млн USD у экв).

Калі параўноўваць усе кварталы ў 2014-2024 гг., то 4 квартал 2022-га выходзіць на першае месца па абʼёме продажаў нерухомасці замежнікам. Таму ў некаторым родзе санкцыі ўскосна аказалі дабратворны ўплыў на беларускую эканоміку – праз механізм інвестыцый нерэзідэнтаў у нерухомасць на тэрыторыі сінявокай.

Да ведама: прамыя замежныя інвестыцыі на чыстай аснове – гэта інвестыцыі без уліку запазычанасці прамому інвестару за тавары, працы і паслугі. У гэтую суму не ўваходзяць даўгавыя інструменты тыпу крэдытаў і пазык, фінансавага лізінгу, крэдыторкі і дэбіторкі і інш.

Прамыя замежныя інвестыцыі на чыстай аснове ўяўляюць сабой розніцу (сальда) паміж валавым паступленнем прамых замежных інвестыцый і валавым адабраннем прамых замежных інвестыцый. У суму інвестыцый уваходзяць укладанні ў рэальны сектар эканомікі, у банкаўскі сектар і набыццё нерэзідэнтамі абʼектаў нерухомасці ў беларускіх рэзідэнтаў.

Замежныя інвестыцыі – гэта інвестыцыі, укладзеныя замежнымі інвестарамі. Прамыя замежныя інвестыцыі – гэта інвестыцыі прамых інвестараў, доля якіх складае не менш за 10% акцый і/або паёў у статутным фондзе арганізацыі.