Лукашысты распляжылі кватэру сястры Максіма Вінярскага Алены Церашковай

Усе рэчы выкінутыя з шафаў.

Тэлеграм-канал сілавікоў апублікаваў відэа з затрыманай Аленай Церашковай - сястрой палітвязня, актывіста грамадзянскай кампаніі «Еўрапейская Беларусь» Максіма Вінярскага.

На відэа Церашкова кажа, што з'яўлялася актывісткай «Еўрапейскай Беларусі» і ўдзельнічала ў палітычнай кампаніі 2019 года, а затрымалі яе за ўдзел у пратэстах у 2020 годзе і за тое, што яна «хадзіла па праезнай частцы і выкарыстоўвала незарэгістраваную сімволіку».

Сілавікі апублікавалі фота разгромленай падчас ператрусу кватэры Церашковай, усе рэчы выкінутыя з шаф.

Аб затрыманні Алены Церашковай стала вядома 20 траўня. У яе - чацвёра дзяцей.

Алена Церашкова - родная сястра асуджанага на 5 гадоў калоніі актывіста грамадскай кампаніі «Еўрапейская Беларусь» Максіма Вінярскага. Апроч асноўнай прафесіі сківічна-тварнага хірурга, яна пісьменніца, перакладчыца, у свой час была двухразовай чэмпіёнкай Беларусі ў таэквандо.

Церашкову з мужам ужо затрымлівалі ў жніўні 2021 года. Чым тады скончылася затрыманне, невядома.