Прэм'ерка Эстоніі расказала аб спробе Пуціна перашкодзіць ёй стаць генеральнай сакратаркай NATO
4- 26.05.2024, 21:12
- 8,848
Новага генеральнага сакратара NATO павінны абраць у ліпені.
Расейскі дыктатар Пуцін спрабаваў перашкодзіць прэм'ер-міністарцы Эстоніі Кае Калас стаць генеральнай сакратаркай NATO. Пра гэта паведамляе РБК-Украіна са спасылкай на швэдскае выданне Svenska Dagbladet.
Са слоў Калас, часткай гэтай перашкоды было абвяшчэнне яе ў вышук расейскімі сілавікамі. У гэтым годзе РФ абвясціла ў вышук некалькі дзясяткаў еўрапейскіх чыноўнікаў, у тым ліку Калас і дзяржсакратара Эстоніі Таймара Петэркопа.
На ейную думку, такім чынам Крэмль хацеў паказаць, што Эстонія несапраўдная краіна, у якой дзейнічаюць расейскія законы, а таксама тое, што сама Калас з'яўляецца «антырасейскім правакатарам».
«Аб'ява аб вышуку таксама стала сігналам для маіх еўрапейскіх калег. Калі мы гаворым пра розныя пасады на еўрапейскім узроўні ці ў NATO, галоўны аргумент супраць мяне ў тым, што я – антырасейскі правакатар. Таму яны і ўнеслі мяне ў гэты спіс, каб даць зразумець, што я іх правакую», - патлумачыла яна.
Змена генеральнага сакратара NATO
Сёлета заканчваецца тэрмін Енса Столтэнбэрга на пасадзе генеральнага сакратара NATO, а таму краінам-сябрам альянсу давядзецца выбраць яго пераемніка. Цяпер "барацьба" фактычна ідзе паміж прэм'ерам Нідэрландаў Маркам Рутэ і прэзідэнтам Румыніі Клаўсам Ёханісам.
У лістападзе 2023 года аб жаданні стаць генеральным сакратаром NATO заяўляла і эстонская прэм'ерка Калас. Таксама на пасаду прэтэндаваў тагачасны міністр замежных спраў Латвіі Крыш'яніс Карыньш.
Новага генеральнага сакратара NATO павінны абраць на саміце альянсу ў Вашынгтоне, які пройдзе ў ліпені.