Вароны прадэманстравалі ўнікальную здольнасць лічыць уголас

Амаль як людзі.

Каманда навукоўцаў высветліла, што вароны могуць "лічыць" уголас. Гэтая спецыфічная праява лічбавай пісьменнасці яшчэ не назіралася ў іншых відаў, акрамя чалавека, піша New Voice.

Даследнікі правялі эксперыменты з трыма варонамі (Corvus corone). Птушак навучылі выдаваць розную колькасць вакалізацый, ад адной да чатырох, пасля паказу адвольнага знака або гукавой падказкі. Пасля таго як яны зрабілі неабходную колькасць карканняў, вароны павінны былі дзяўбануць мішэнь, паказаўшы, што выканалі задачу. Экспэрымент паказаў, што ўсе тры вароны былі здольныя выдаваць правільную колькасць карканняў у адказ на сігналы.

Навукоўцы кажуць, што гэта падобна да таго, як дзеці ранняга ўзросту лічаць, выкарыстоўваючы несімвалічную прыблізную сістэму вылічэння.

"Гэтая здольнасць варон таксама паказвае на навыкі ліку малых да таго, як яны навучацца разумець галоўныя лікавыя словы, і таму можа быць эвалюцыйным папярэднікам сапраўднага лічэння", – сцвярджае каманда даследчыкаў з Цюбінгенскага ўніверсітэта ў Нямеччыне ў артыкуле, апублікаванай у Science.

Іншыя жывёлы, такія як меданосныя пчолы, ужо прадэманстравалі здольнасць разумець лікі. Але здольнасць лічыць уголас дагэтуль лічылася спецыфічнай праявай лічбавай пісьменнасці, на якую здольны толькі чалавек. Гэты навык патрабуе не толькі разумення, але і мэтанакіраванага галасавога кантролю з мэтай камунікацыі.

«Для мэтанакіраванага стварэння пэўнай колькасці вакалізацый патрабуецца складаная камбінацыя лікавых здольнасцяў і галасавога кантролю. Пакуль невядома, ці існуе гэтая здольнасць у жывёл, акрамя людзей. Мы паказваем, што вароны могуць гнутка ўзнаўляць пераменную колькасць ад адной да чатырох вакалізацый у адказ на адвольныя сігналы, звязаныя з лікавымі значэннямі», - пішуць навукоўцы.

Гэта адкрыццё можа сведчыць аб існаванні дагэтуль невядомага канала камунікацыі птушак у дзікай прыродзе.