Надаль на сваім апошнім «Ралан Гарос» упершыню саступіў у першым раундзе

Раней гішпанец заявіў, што сёлетні сезон стане астатнім у яго кар'еры.

Гішпанец Рафаэль Надаль саступіў Аляксандру Звераву, які прадстаўляе Нямеччыну, з лікам 3:6, 6:7, 3:6 у першым коле Адкрытага чэмпіянату Францыі («Ралан Гарос»).

Надаль на гэты момант займае 275-е месца, якое не дае месца на «Ралан Гарос». Але ён атрымаў запрашэнне ад арганізатараў. У сувязі з нізкім рэйтынгам у спаборнікі гішпанцу трапіў Аляксандр Звераў, які займае чацвёртае месца.

Надаль упершыню ў кар'еры саступіў у першым коле «Ралан Гарос». Раней ён ні разу не саступаў на Адкрытым чэмпіянаце Францыі раней за чацвёрты раунд. У 2016-м ён пакінуў Парыж пасля трэцяга раунда, бо зняўся з турніру праз траўму.

Гішпанец з'яўляецца рэкардсменам па тытулах на Адкрытым чэмпіянаце Францыі - 14 тытулаў. Ён атрымаў 112 перамог пры чатырох паразах за час выступлення на турніры.

Раней гішпанец заявіў, што сёлетні сезон стане астатнім у яго кар'еры. Ён прапусціў праз траўму ўвесь мінулы сезон, пры гэтым не змог аднавіцца да старту сёлетняга. Аднак ён адмовіўся ад развітальнай цырымоніі на «Ралан Гарос». 37-гадовы гішпанец не выключае, што можа прадоўжыць выступленне пасля гэтага сезона, але найбольш імаверны сцэнарый — заканчэнне.

Надаль з'яўляецца 22-разовым пераможцам турніраў серыі «Вялікага шалома», уладальнікам кар'ернага «Залатога шалома» ў адзіночным разрадзе.

Звераў з'яўляецца чацвёртай ракеткай свету. Ён нарадзіўся ў сям'і тэнісістаў, якія эмігравалі з СССР. На рахунку 27-гадовага гульца 22 тытулы ATP.

Адкрыты чэмпіянат Францыі працягнецца да 8 чэрвеня. Прызавы фонд склаў €54 млн. У 2023 годзе ў «Ралан Гарос» перамаглі серб Новак Джокавіч і полька Іга Свёнтэк.