Швэцыя абвясціла пра найбуйнейшы пакет вайсковай дапамогі Украіне

У яго ўвойдуць самалёты і БТРы.

Урад Швэцыі абвясціў пра новы пакет вайсковай дапамогі для Украіны. Ён з'яўляецца самым вялікім на сёння, яго кошт перавышае 13 мільярдаў швэдскіх крон (1,3 млрд даляраў)

Пра гэта паведамляе Sydsvenskan.

Сённяшні пакет вайсковай дапамогі стане шаснаццатым па ліку ад Швэцыі з моманту пачатку поўнамаштабнага ўварвання Расеі ва Украіну. Грошы, якія будуць уключаныя ў дадатковы бюджэт, апроч іншага, дазволяць умацаваць супрацьпаветраную абарону Украіны.

Так, Швэцыя перадасць самалёт радыёлакацыйнай выведкі і кіравання ASC 890, які дасць Украіне «цалкам новы патэнцыял радыёлакацыйнай выведкі і баявога кіравання супраць цэляў у паветры і на моры», а таксама ўмацуе яе здольнасць знішчаць цэлі ў доўгатэрміновай перспектыве. Самалёты таксама пастаўляюцца з навучальным і тэхнічным абсталяваннем.

Акрамя гэтага Швэцыя перадасць увесь свой парк бронетранспарцёраў 302 для падтрымкі фармавання новых брыгад украінскага войска. У пакет таксама ўваходзіць знішчальнік Rb 99, а таксама артылерыйскія боепрыпасы і рэсурсы для абслугоўвання раней перададзенай тэхнікі.

З улікам перададзеных сёння сродкаў Швэцыя ўжо надала Украіне падтрымку ў суме 43,5 мільярда швэдскіх крон.