Rzeczpospolita: Затрыманыя ў Польшчы беларусы планавалі дыверсіі

У гандлёвых цэнтрах, на складах і ў рэстарацыях.

Затрыманыя ў Польшчы два беларусы і паляк мелі намер учыніць падпалы ў гандлёвых цэнтрах, рэстарацыях, будаўнічых складах на заданне расейскай выведкі. Пра гэта паведамляе газета Rzeczpospolita.

Адзначаецца, што гэтыя арышты зрабілі пасля атрымання новых вынікаў расследавання, праведзенага Ніжнесілезскім аддзяленнем Управы ў арганізаванай злачыннасці і карупцыі Нацыянальнай пракуратуры.

З інфармацыі выдання, спачатку ў студзені гэтага года быў затрыманы ўкраінец, наняты расейцамі для ўчынення дыверсій. Ён планаваў падпаліць важныя аб'екты ва Уроцлаве, у тым ліку лакафарбавы завод. 28 траўня былі затрыманыя яшчэ тры чалавекі (два беларусы і адзін паляк). Яны таксама на заданне Галоўнай управы выведкі Расеі рыхтавалі аналагічныя дыверсіі ў Польшчы, прычым у большым маштабе. За кожны разбураны аб'ект ім абяцалі заплаціць 10 тысяч еўраў.

«Мэтай падпалаў было выклікаць хаос, неспакой, запалохванне, нанясенне шкоды маёмасці і, не выключана, людзям», - адзначае выданне.

Вынікі расследавання паказалі, што затрыманыя спрабавалі падпаліць адзін аб'ект у Гданьску, а таксама падпалілі два будынкі ў Гдыні і пад Варшавай.

Аднаго беларуса затрымалі ў Прушкуве, дзе ён жыў, другога - у Варшаве. Мужчынам 37 і 35 гадоў, у аднаго з іх ёсць "карта паляка". Трэці затрыманы - 40-гадовы паляк, жыхар Паморскага ваяводства.

Паводле інфармацыі газеты, раней затрыманы ўкраінец прыехаў у Польшчу з Нямеччыны, ён быў удзельнікам буйной злачыннай групы, у якую ўваходзілі таксама трое нядаўна арыштаваных.

Затрыманых абвінавачваюць ва "ўдзеле ў арганізаванай злачыннай групе, накіраванай на правядзенне дзейнасці замежнай выведкі супраць Рэспублікі Польшча", у абмен на "атрыманні фінансавай выгады". Агулам за два крымінальныя артыкулы ім пагражае пакаранне аж да пажыццёвага зняволення.