Reuters: Францыя адправіць некалькі сотняў вайскоўцаў ва Украіну

У якасці інструктараў.

Францыя неўзабаве можа адправіць вайсковых інструктараў ва Украіну, нягледзячы на асцярогу некаторых супольнікаў і крытыку з боку Расеі, піша агенцтва Reuters у чацвер, 30 траўня, спасылаючыся на крыніцы.

Са звестак Reuters, Францыя можа абвясціць пра сваю пастанову на наступным тыдні падчас візіту прэзідэнта Украіны Уладзіміра Зяленскага ў краіну.

Ананімныя дыпламаты сцвярджаюць, што Парыж спадзяецца сфармаваць і ўзначаліць кааліцыю краін, якія прапануюць такую дапамогу Кіеву ў вайсковых намаганнях, нават нягледзячы на тое, што некаторыя з яго партнёраў асцерагаюцца прамога канфлікту з Расеяй.

Двое дыпламатаў адзначылі, што Францыя спачатку адправіць абмежаваную колькасць персаналу для ацэнкі магчымасці місіі, а потым накіруе некалькі сотняў інструктараў.

Адзначаецца, што навучанне будзе засяроджана на размінаванні, падтрыманні абсталявання ў працоўным стане і тэхнічным досведзе для вайсковых самалётаў.