Ізраіль заявіў аб поўнай аблозе сектара Газа

Ізраільскія вайскоўцы знайшлі блізу 20 тунэляў, якія вядуць у Егіпет.

Войска абароны Ізраілю (ЦАХАЛ) узяла пад "аператыўны кантроль" усю мяжу паміж сектарам Газа і Егіптам, заявіў афіцыйны прадстаўнік ЦАХАЛ контр-адмірал Даніэль Хагары.

Паводле ягоных слоў, адцінак тэрыторыі працягласцю 14 км, таксама вядомы як "Філадэльфійскі маршрут", служыў "кіслародным трубаправодам для ХАМАСа". Уздоўж калідора, які прымыкае да паўднёвага горада Рафах, ізраільскія вайскоўцы выявілі блізу 20 тунэляў, якія вядуць у Егіпет. Праз іх, як мяркуюць у ЦАХАЛ, ажыццяўляліся кантрабандныя пастаўкі зброі ў сектар Газа. Патрапіць у гэтыя тунэлі можна было з дапамогай 82 шахт.

Таксама на мяжы былі знойдзены дзясяткі ракетных установак. ХАМАС размясціў іх за дзясятках метраў ад егіпецкай мяжы, "каб Ізраіль не нанёс удар па агароджы з Егіптам", растлумачыў Хагары. Пры гэтым, паводле ягоных слоў, толькі за апошнія тыдні блізу 70 ракет былі выпушчаныя па Ізраілі з Рафаха.

Цяпер наземныя войскі Ізраіля занялі большую частку калідора. Невялікі адцінак побач з узбярэжжам, дзе няма ізраільскай жывой сілы, ЦАХАЛ кантралюе з дапамогай назірання і агнявой моцы.

У пачатку траўня ізраільскае войска пачала наземную аперацыю ў Рафаху. ЦАХАЛ заявіла аб нанясенні «кропкавых удараў» па цэлях ва ўсходняй частцы горада і знішчэнні інфраструктуры і падземных тунэляў ХАМАС.

Ізраільскія ўлады патлумачылі неабходнасць аперацыі ў Рафаху тым, што менавіта там хаваюцца чатыры з шасці ацалелых батальёнаў ХАМАСа, а таксама ўтрымліваюцца ізраільскія закладнікі, выкрадзеныя падчас нападу групоўкі на Ізраіль 7 кастрычніка.