У Менску адчыніўся прэміяльны супермаркет

Што і за колькі там прадаюць.

У «Маяку Менска» запрацавала самая буйная крама сеткі «Сем пятніцаў XXL». Супермаркет мае намер прывабліваць пакупнікоў прэміяльнымі таварамі, эксклюзівам і рэстараннай ежай. Выданне Tochka.by паглядзела, што і за колькі там прадаюць.

Кампанія «Юністар Груп», якая адчыніла гандлёвы аб'ект, абяцала эксклюзіўны асартымент, які не знайсці ў канкурэнтаў, і кошты шэрагу пазіцый «ніжэйшыя за сярэднія на рынку».

Адчыняючы краму, уладальнікі гаварылі, што спадзяюцца ў першую чаргу на пакупнікоў з Уручча, Новай Баравой, ПВТ, а асноўнымі наведвальнікамі стануць жыхары 10-тысячнага «Маяка Менска» і прылеглага Усходу.

Як адзначае Tochka.by, чакаць, што абсалютна ўсё на паліцах будзе эксклюзівам, не варта: многія этыкеткі можна знайсці ў любым іншым супермаркеце. Сярод тавараў – прадукцыя з Беларусі, краінаў СНД, Еўропы, Амерыкі і Паўднёва-Усходняй Азіі.

У мясным аддзеле можна набыць качыны кумпяк за 17 рублёў, хамон з такім самым коштам за 70 г.

У рыбным аддзеле прапануюць некалькі відаў стэйкаў фарэлі. Замарожаны можна набыць за 27 рублёў, свежы – за 74,67 рубля, а вэнджаны абыдзецца больш чым на 100 рублёў за кг.

Тамсама прадаюць вяленага шчупака, кіжуча і іншыя морапрадукты. Ёсць і камчацкі краб амаль за 100 рублёў, а таксама макароны за 20 рублёў за пачак, блінцы коштам 37,29 рубля за кг і пельмені за 16,29 рубля.