CNN: Трамп можа стаць прэзідэнтам, нават сеўшы ў турму

Амерыканскія законы не забараняюць асуджаным злачынцам балатавацца на прэзідэнцкую пасаду.

11 ліпеня Дональду Трампу абвесцяць меру пакарання паводле справы, дзе ён ужо прызнаны вінаватым у фінансавых махінацыях. Калі яму прызначаць турэмнае зняволенне, ён у тэорыі можа абрацца прэзідэнтам ЗША нават з турмы. Аб гэтым піша CNN (пераклад - «Уніян»).

Прафесар права Каліфарнійскага ўніверсітэта ў Лос-Анджэлесе Рычард Л. Хасэн - адзін з вядучых экспертаў ЗША ў выбарчым заканадаўстве - адзначае, што ў амерыканскай канстытуцыі няма забароны для асуджаных злачынцаў балатавацца на пасаду прэзідэнта.

- З юрыдычнага пункту гледжання нічога не мяняецца са статусам Трампа як кандыдата, - заявіў Хасэн у каментары пастановы суда.

Акрамя таго, асобныя штаты не могуць дыскваліфікаваць кандыдатуру Трампа праз яго спробы скасаваць вынікі выбараў 2020 года.

Цікава, што Трамп, як рэзідэнт штата Фларыда, падпарадкоўваецца яго дастаткова жорсткім законам. У гэтым штаце асуджаным злачынцам забаронена галасаваць на выбарах да адбыцця пакарання. Гэтая норма неадназначная і аспрэчваецца юрыстамі, але ў тэорыі Трамп можа страціць права голасу на выбарах, але не магчымасць балатавацца.

Нагадаем, суд прысяжных у Нью-Ёрку прызнаў экс-прэзідэнта ЗША Дональда Трампа вінаватым у фінансавых махінацыях пры выплатах актрысе Стормі Дэніэлс. Трампа абвінавачваюць у фальсіфікацыі справаздачнасці з мэтай схаваць выплаты грошай за маўчанне жанчыны. Гэта адбылося за некалькі тыдняў да прэзідэнцкіх выбараў 2016 года.

Пасяджэнне суда, на якім будзе абвешчана аб прызначаным пакаранні, адбудзецца 11 ліпеня. У тэорыі Трампу пагражае да чатырох гадоў зняволення, хаця ён можа атрымаць і ўмоўны тэрмін.