З'явіліся спадарожнікавыя здымкі наступстваў удару УСУ па порце «Каўказ»

Падбіты вельмі важны аб'ект акупантаў.

У выніку ракетнага ўдару УСУ па порце «Каўказ» каля акупаванай Керчы часткова разбураная нафтабаза. Спадарожнікавыя здымкі наступстваў удару за 31 траўня ад Planet Labs апублікавалі «Схемы».

«На спадарожнікавых здымках відаць наступствы ракетных удараў, ажыццёўленых раніцай таго ж дня. Згодна з выявамі, пашкоджаная частка нафтавага тэрмінала, размешчаная на тэрыторыі порта «Каўказ» каля Керчы ў акупаваным Крыме. Ступень паразы збудавання можна ацаніць, параўноўваючы здымкі 31 траўня з фатаграфіямі, якія спадарожнік зрабіў на дзень раней», – гаворыцца ў паведамленні.

Таксама адзначаецца, што на апошніх здымках, акрамя пашкоджанняў нафтабазы, бачна, што з акваторыі порта прыбралі вялікія караблі.

Адзначаецца, што паводле звестак праекту «Радыё Свабода» «Крым.Рэаліі», нафтабаза ў порце «Каўказ» выконвае важную ролю ў пастаўках Расеяй паліва на акупаваныя ёю тэрыторыі – Крым, а таксама асобныя раёны Херсонскай, Запарожскай і Данецкай абласцей.

«Частковая параза нафтабазы, а таксама вывад са строю чыгуначнага парома “Авангард”, у выніку ракетнага ўдару па Керчанскім порце напярэдадні, можа істотна ўскладніць лагістыку для расейскага войска ў Крыме і на паўднёвых франтах», – гаворыцца ў паведамленні.