Гетман УСУ Сырскі: Расейцы наступаюць па ўсім фронце

Асноўныя ўдары - на двух кірунках.

Расейскае войска працягвае вядзенне актыўных наступальных дзеянняў рознай інтэнсіўнасці па ўсёй лініі фронту ва Украіне, асноўныя намаганні засяроджваючы на Пакроўскім і Курахаўскай кірунках.

Пра гэта заявіў гетман УСУ Аляксандр Сырскі.

На Пакроўскім і Курахаўскім кірунках Расея засяродзіла найбольшую колькасць сваіх штурмавых падраздзяленняў са складу васьмі ўдарных брыгад. Аднак, паводле слоў Сырскага, ваяры УСУ "мужна стрымліваюць рух ворага наперад".

Ён адзначыў, што баі працягваюцца ў раёнах Часавага Яра, Кляшчэеўкі, Калінаўкі. Акупанты спрабуюць захапіць гэтыя населеныя пункты для пашырэння геаграфіі свайго прасоўвання ў кірунку Краматорска і Славянска.

«Беспаспяхова вораг штурмуе Белагароўку, якая стала красамоўным прыкладам стойкасці ўкраінскага войска на Луганшчыне. Супраціўнік рвецца да Северску з двух кірункаў, але кожны раз адкочваецца назад, пакідаючы трупы сваіх салдат», - распавёў гетман.

У той жа час на Харкаўскім кірунку расейцы вядуць безвыніковыя дзеянні, спрабуючы рушыць наперад у глыбіню баявых парадкаў Сіл абароны Украіны і стварыць так званы «пояс бяспекі».

Сырскі адзначыў, што ў Ваўчанску на Харкаўшчыне супраціўнік заграз, нягледзячы на залучаныя сілы і сродкі, якія ён пастаянна папаўняе за кошт падраздзяленняў з іншых кірункаў.

На Запарожскім кірунку краіна-агрэсарка ажыццяўляе наступленне ў раёнах Старамаёрскае і Рабоціна, аднак беспаспяхова. Пры гэтым у раёне Крынак сітуацыя без істотных змен.

Гетман падкрэсліў, што задачамі УСУ зараз з'яўляецца ўтрыманне занятых межаў і пазіцый, недапушчэнне прарыву абароны, максімальнае знішчэнне жывой сілы і тэхнікі ворага. Ён адзначыў, што Сілам абароны трэба дасягнуць перавагі, зменшыць страты, змяніць абарончую і наступальную псіхалогію.

«Для гэтага мы засяроджваем намаганні на павышэнні якасці правядзення заняткаў з падраздзяленнямі, якія праходзяць баявое зладжванне, падчас якіх адпрацоўваюцца пытанні барацьбы з дронамі супраціўніка і абарона ад іх, перамяшчэння на полі бою, карыстанне сродкамі РЭБ, эвакуацыя параненых і многія іншыя пытанні, якія актуальныя ва ўмовах сучаснага бою», - дадаў Сырскі.